پاکستان میں مختلف شعبوں میں سرمایہ کاری کے پرکشش مواقع ہیں۔صدرِ مملکت

اسلام آباد: صدرِ مملکت ڈاکٹر عارف علوی نے کہا ہے کہ پاکستان میں مختلف شعبوں میں سرمایہ کاری کے پرکشش مواقع موجود ہیں۔

تفصیلات کے مطابق صدرِ مملکت ڈاکٹر عارف علوی سے پاکستان میں آسٹریلوی ہائی کمشنر نیل ہاکنز نے ملاقات کی جس کے دوران پاک آسٹریلیا تعلقات، دو طرفہ تعاون اور باہمی دلچسپی کے مختلف امور زیرِ غور ائے۔

یہ بھی پڑھیں:

6جولائی سے اسلام آباد سے چینگڈو براہِ راست پرواز کا اعلان

ملاقات کے دوران گفتگو کرتے ہوئے صدرِ مملکت نے کہا کہ پاکستان میں مختلف شعبہ جات میں سرمایہ کاری کے وسیع مواقع ہیں۔ آسٹریلین کمپنیاں بنیادی ڈھانچے کی ترقی اور زراعت میں سرمایہ کاری کرسکتی ہیں۔

گفتگو کے دوران صدرِ مملکت ڈاکٹر عارف علوی نے کہا کہ آسٹریلوی کمپنیاں پاکستان کے مختلف دیگر شعبہ جات میں بھی سرمایہ کاری کرسکتی ہیں جن میں قابلِ تجدید توانائی اور کان کنی جیسے شعبے شامل ہیں۔

صدرِ مملکت نے آسٹریلین ہائی کمشنر سے ملاقات کے دوران کہا کہ پاکستان میں مختلف شعبوں میں انتہائی ہنر مند انسانی وسائل کا ایک بڑا ذخیرہ موجود ہے۔ آسٹریلیا میں پاکستانی طلبہ کیلئے وسیع تعلیمی مواقع باعثِ اطمینان ہیں۔

قبل از ملاقات آسٹریلین ہائی کمشنر نیل ہاکنز روایتی بگھی میں سوار ہو کر ایوانِ صدر پہنچے۔ پاک فوج کے چاق و چوبند دستے نے آسٹریلین ہائی کمشنر کو گارڈ آف آنرز پیش کیا۔ نیل ہاکنز نے گارڈ آنرز کا معائنہ بھی کیا۔