گوگل نیوز پر ہمیں فالو کریںتاریخ پر نظر دوڑائیں تو پتا چلتا ہے کہ ”یہ انسان نہیں وحشی ہیں“ کے مفروضے کو جواز بنا کر یورپی استعماری طاقتوں نے لاطینی امریکا سے شمالی امریکا تک اور افریقہ سے ایشیا تک مقامی لوگوں کی نسل کشی کی۔ اس تناظر میں جب اسرائیلی وزیر دفاع یوو گلانٹ نے فلسطینی کو جانور قرار دیا تھا تو مہذب دنیا کو خطرے کی گھنٹی بجا دینی چاہیے تھی، مگر ایسا نہیں ہوا۔ بجائے اس کے کہ اسرائیل کو ملامت کیا جاتا، انسانی حقوق کے خودساختہ چمپین امریکا اور یورپی حکام کے بیانات اسرائیل کو فلسیطینیوں کی نسل کشی کی شہہ دینے لگے۔ اس کی صرف یہی وجہ سمجھ میں آتی ہے کہ اسرائیل اور مغرب نے عرصہ دراز سے فلسطینیوں کی سلب انسانیت کو اس درجہ پر پہنچا دیا ہے کہ جہاں فلسطینیوں پر مظالم کو ایک عام سی بات سمجھا جانے لگا ہے۔
غزہ میں فلسطینی بڑی تعداد میں مر رہے ہیں۔ 8 اکتوبر سے غزہ پر اسرائیلی بمباری کا سلسلہ جاری ہے اور علاقے کا محاصرہ کرلیا گیا ہے، اب تک کی اطلاعات کے مطابق 2300 فلسطینی مارے جا چکے ہیں جن میں 700 بچے بھی شامل ہیں اور 10,000 زخمی ہیں۔ بڑے پیمانے پر عمارتیں زمین بوس ہوچکی ہیں جس کے باعث 423,000 سے زیادہ افراد بے گھر ہوچکے ہیں۔ اور ابھی تک، فلسطینیوں کے لیے ہمدردی کا کوئی اظہار نہیں کیا گیا۔ درحقیقت، امریکہ اور یورپی ممالک نے جنگ بندی کے رسمی مطالبات یا فلسطینی شہریوں کے لیے تشویش کے بیانات پر بھی مزاحمت کی ہے، اس طرح اسرائیل کو اپنی فوجی مہم کو مناسب سمجھے جانے کی اجازت دے دی ہے۔
یہاں تک کہ اسرائیل کا غزہ کو پانی، خوراک، ایندھن، یا طبی سامان کی فراہمی بند کرنے کا فیصلہ – بین الاقوامی قانون کے تحت ایک سنگین جنگی جرم سمجھا جاتا ہے، مغرب کی طرف سے اس پر کسی قسم کے احتجاج یا اس پر کوئی بیان نہ دینا اسرائیل کی پشت پناہی کے مترادف ہے، تاہم، سچ بولنا ضروری ہے، اور سچائی گھناؤنی اور مایوس کن ہے کہ غزہ ایک حراستی کیمپ ہے۔
غزہ کو انسانی تجربہ گاہ کے طور پر استعمال کیا جاتا ہے جہاں اسرائیلی اسلحہ ساز اپنی مصنوعات کو فلسطینیوں کے جسموں، نفسیات اور روحوں پر آزماتے ہیں۔ وہ لوگ جو اس بات پر اصرار کرتے ہیں کہ حماس کا حملہ ”بلا اشتعال” تھا، انھوں نے آسانی سے ان ظالمانہ حالات کو نظر انداز کر دیا جو فلسطینیوں کو برداشت کرنا پڑ رہے ہیں، جن میں 75 سال کی نسل کشی، غزہ پر 17 سال کا مسلسل محاصرہ شامل ہے۔ وہ سفاکانہ قبضے کی تکلیف کو آسانی سے بھول بیٹھے ہیں۔
اسرائیل فلسطین تنازعہ کی تاریخ مخالف بیانیوں سے بھری پڑی ہے۔ اس سے کوئی فرق نہیں پڑتا ہے کہ آپ جس بیانیے کا انتخاب کرتے ہیں، اس میں موجودہ صورتحال واضح ہے۔ اس وقت اسرائیل کا فلسطینیوں کو ایک قابل عمل اور خودمختار ریاست کے قیام کی اجازت دینے کا کوئی ارادہ نہیں ہے۔ اس کا منصوبہ ہے کہ فلسطینی علاقوں کے ایک بڑے حصے کو قبضے میں رکھا جائے، جس میں ممکنہ فلسطینی ریاست کی حدود اور فضائی حدود بھی شامل ہیں۔ آج، غیر انسانی رویہ اس حد تک بڑھ چکا ہے جہاں بے بس فلسطینیوں کو خود اپنی موت کا ذمہ دار ٹھہرایا جارہا ہے۔
