گوگل نیوز پر ہمیں فالو کریںسندھ حکومت نے صوبے کے نوجوانوں کے لیے روزگار کے مواقع پیدا کرنے کے مقصد سے ایک نئی ای ٹیکسی اسکیم متعارف کروادی ہے۔
اطلاعات کے وزیر شرجیل انعام میمن نے اعلان کیا کہ اس پروگرام کے تحت نوجوان افراد کو سبسڈی پر الیکٹرک ٹیکسیاں خریدنے اور چلانے کا موقع فراہم کیا جائے گا۔ گاڑیوں کی لاگت حکومت، بینکوں اور اسکیم میں شامل افراد کے درمیان تقسیم ہوگی۔
کراچی میں ایک اجلاس کے دوران سینئر وزیر شرجیل میمن نے چینی آٹو موبائل مینوفیکچرر جی اے سی اور دیوان موٹرز کے نمائندوں سے ملاقات کی۔
جی اے سی کے جنرل مینیجر چو سونگ نے الیکٹرک گاڑیوں پر ایک تفصیلی پریزنٹیشن دی، جس میں سندھ میں الیکٹرک ٹیکسیاں متعارف کرانے کے مختلف پہلوؤں پر غور کیا گیا۔
شرجیل میمن نے جی اے سی کی سرمایہ کاری کو فروغ دینے کے لیے سندھ حکومت کی مکمل تعاون کی یقین دہانی کروائی۔ انہوں نے چارجنگ اسٹیشنز کی تعمیر، قواعد و ضوابط کو آسان بنانے، اور سرمایہ کاروں کے لیے کاروبار دوست ماحول فراہم کرنے کے لیے اقدامات کی یقین دہانی کروائی۔
صوبائی وزیر نے کہا کہ یہ منصوبہ نہ صرف محفوظ اور جدید سفری سہولیات فراہم کرے گا بلکہ کاربن کے اخراج میں کمی لا کر ماحولیات کی بہتری میں بھی مددگار ثابت ہوگا۔ اس کے علاوہ اس منصوبے کے ذریعے نوجوانوں کے لیے بڑے پیمانے پر روزگار کے مواقع پیدا ہوں گے۔
اس منصوبے کے تحت خواتین مسافروں کے لیے خصوصی “پنک ٹیکسی” سروس بھی شروع کی جائے گی، جو ان کے لیے محفوظ اور قابل اعتماد سفری سہولت فراہم کرے گی۔ شرجیل میمن نے حکومت کے عزم کا اظہار کیا کہ یہ ماحول دوست ٹیکسیاں جلد از جلد متعارف کرائی جائیں تاکہ شہری جدید اور پائیدار سفری سہولیات سے فائدہ اٹھا سکیں۔
