گوگل نیوز پر ہمیں فالو کریںاسلام آباد: پاکستان کی حکومت نے بین الاقوامی مالیاتی فنڈ (آئی ایم ایف) کے جاری ریویو مذاکرات کے دوران زیادہ سے زیادہ ریلیف حاصل کرنے کے لیے کوششیں تیز کر دی ہیں۔
ذرائع کا کہنا ہے کہ وزیرِاعظم شہباز شریف نے حکام کو ہدایت دی ہے کہ سیلاب اور حالیہ شدید بارشوں کے باعث آئی ایم ایف کے ساتھ مذاکرات میں وسیع تر رعایتیں حاصل کی جائیں۔
ذرائع کے مطابق حکومت کی کوشش ہے کہ متبادل ریونیو اقدامات پیش کر کے آئی ایم ایف کو مطمئن کیا جائے تاکہ منی بجٹ نافذ نہ کرنا پڑے۔
حکام کی جانب سے موجودہ ٹیکس اقدامات کے سخت نفاذ کو بطور متبادل تجویز کیا جائے گا تاکہ فنڈ کے تحفظات دور کیے جا سکیں۔
پنجاب میں پراسرار بیماری کا حملہ؛ لاہور میں منکی پاکس کا پہلا کیس رپورٹ
وزارتِ خزانہ اس بات پر بھی تیاری کر رہی ہے کہ آئی ایم ایف کو سیلابی نقصانات کے تناظر میں رعایت دینے پر قائل کیا جائے۔
خصوصی توجہ ان گھریلو صارفین کے بجلی کے بلوں میں ریلیف پر دی جائے گی جو سیلاب سے متاثر ہوئے ہیں، ساتھ ہی زرعی قرضوں کی ادائیگی میں بھی سہولت حاصل کرنے کی کوشش کی جائے گی۔
ذرائع کے مطابق حکام آئی ایم ایف سے وفاقی بورڈ آف ریونیو (ایف بی آر) کے ٹیکس اہداف میں کمی کی درخواست بھی کریں گے کیونکہ سیلاب کے باعث ٹیکس وصولیوں میں کمی واقع ہوئی ہے۔
اس حوالے سے آئی ایم ایف کو ٹیکس وصولیوں میں کمی اور قدرتی آفات کے مالیاتی کارکردگی پر اثرات پر تفصیلی بریفنگ دی جائے گی۔
مذاکرات میں مجموعی قومی پیداوار (جی ڈی پی) کی شرح نمو کے ہدف میں معمولی کمی کی تجویز بھی زیرِ غور آئے گی تاکہ نئے ٹیکس عائد کیے بغیر مالیاتی توازن برقرار رکھا جا سکے۔
مزید برآں سیلاب کے بعد بحالی اور تعمیر نو کی ضرورت کے پیشِ نظر وفاقی اخراجات میں اضافے پر بھی بات ہو سکتی ہے۔
