گوگل نیوز پر ہمیں فالو کریںممبئی: معروف پنجابی سپر اسٹار دلجیت دوسانجھ نے بالآخر اپنی فلم سردار جی 3 پر بھارت میں عائد پابندی کے حوالے سے خاموشی توڑ دی ہے۔ انہوں نے اس فیصلے کو مضحکہ خیز اور غیر منصفانہ قرار دیتے ہوئے کہا کہ فن اور کھیل دونوں کو سیاست سے بالاتر ہونا چاہیے۔
ایک انٹرٹینمنٹ پورٹل کو دیے گئے انٹرویو میں دلجیت نے نشاندہی کی کہ بھارت اور پاکستان کے درمیان سیاسی کشیدگی کے باوجود دونوں ممالک ایک ہی میدان میں کرکٹ کھیلتے ہیں لیکن ان کی فلم کو محض پاکستانی فنکاروں کی موجودگی کی بنیاد پر ریلیز سے روک دیا گیا۔ انہوں نے سوال اٹھایا: اگر کھیل دونوں ممالک کو ایک ساتھ لا سکتا ہے تو فن کیوں نہیں؟
اداکار نے واضح کیا کہ سردار جی 3 کی شوٹنگ پاہلگام حملے سے قبل مکمل ہوچکی تھی اور اس کا اس سانحے سے کوئی تعلق نہیں۔ انہوں نے کہا کہ وہ سچائی کے ساتھ کھڑے ہیں اور اپنی فلم اور اس کے پیغام پر یقین رکھتے ہیں۔
فلم سردار جی 3 میں دلجیت دوسانجھ کے ساتھ پاکستانی اداکارہ ہانیہ عامر مرکزی کردار میں جلوہ گر ہوئی ہیں۔ یہ فلم دنیا بھر میں 27 جون 2025 کو ریلیز کی گئی اور پنجابی کلچر، کامیڈی، ایکشن اور فینٹسی کے منفرد امتزاج کی عکاس ہے۔
کراچی والوں تیار ہو جاؤ! ینگ سٹنرز 4 اکتوبر کو ایکسپو سینٹر میں ہلا گلا مچانے آ رہے ہیں
یاد رہے کہ سردار جی (2015) اور سردار جی 2 (2016) بھارت اور بیرونِ ملک باکس آفس پر شاندار کامیابی حاصل کرچکی تھیں، لیکن تیسرے حصے کو سرحد پار کاسٹ کی وجہ سے شدید مخالفت کا سامنا کرنا پڑا۔
بھارتی فلمی تنظیموں بشمول فیڈریشن آف ویسٹرن انڈین سنی ایمپلائیز اور آل انڈیا سنی ورکرز ایسوسی ایشن نے سنسر بورڈ سے فلم کو کلیئر نہ کرنے کی سفارش کی، جس کے نتیجے میں فلم کو بھارتی سنیما گھروں سے ہٹا دیا گیا۔
بھارت میں پابندی کے باوجود، فلم نے بین الاقوامی سطح پر اپنی ریلیز برقرار رکھی اور بڑے پیمانے پر پذیرائی حاصل کی۔ تنازع نے فلم کی شہرت کو مزید بڑھا دیا اور شائقین نے اس کے پیغام کو سراہا۔
