گوگل نیوز پر ہمیں فالو کریںپاکستان میں متحدہ عرب امارات کے سفیر فیصل نیاز ترمذی نے کہا ہےکہ پاکستان اور یو اے ای کے درمیان ریلوے کے شعبے میں تعاون کو مزید وسعت دی جائے گی۔ انہوں نے یہ بات ابوظہبی میں ہونے والی ایک بین الاقوامی ریل کانفرنس کے دوران کہی جہاں پاکستان کا وفد بھی شریک تھا۔
فیصل ترمذی کے مطابق یو اے ای پہلے ہی پاکستان کے بڑے ریلوے منصوبے مین لائن 1 (ایم ایل-1) کا حصہ ہے اور اس حوالے سے ایتیھاد ریل کے ساتھ بات چیت جاری ہے۔ یہ منصوبہ کراچی سے پشاور تک تقریباً 1,872 کلومیٹر طویل ریل ٹریک کو جدید خطوط پر استوار کرنے کے لیے بنایا جا رہا ہے جس میں نئی پٹریاں بچھانے، سگنل سسٹم بہتر بنانے رفتار بڑھانے اور اسٹیشنوں کو اپ گریڈ کرنے جیسے کام شامل ہیں۔
اسی طرح ایم ایل-3 نامی ایک اور منصوبہ کوئٹہ سے جیکب آباد اور کوٹری تک کی ریلوے لائن کو جوڑنے کے لیے تیار کیا جا رہا ہے جس کا مقصد مال برداری کی صلاحیت کو بڑھانا اور مختلف علاقوں کو آپس میں بہتر طور پر منسلک کرنا ہے۔
یہ بیانات اُس وقت سامنے آئے جب وزیرِ مملکت برائے خزانہ و ریلوے بلال اظہر کیانی کی قیادت میں پاکستانی وفد نے ابوظہبی میں ہونے والی عالمی ریل کانفرنس 2025 میں شرکت کی۔ تین روزہ ایونٹ میں دنیا بھر سے وزراء بین الاقوامی سی ای اوز اور ماہرین نے شرکت کی جس کا مرکزی موضوع تھا ٹرانسپورٹ اور عالمی رابطوں کا مستقبل۔
سفیر ترمذی نے کہا کہ یہ موقع پاکستان کے لیے اپنی اہم جغرافیائی حیثیت کو دنیا کے سامنے اجاگر کرنے کا بھی تھا کیونکہ پاکستان وسطی ایشیا جنوبی ایشیا اور مشرقِ وسطیٰ کے سنگم پر واقع ہے، جو اسے ریجنل رابطوں کے لیے مثالی بناتا ہے۔
گاڑی خریدنے کا ارادہ ہے؟ پاکستان میں نئے قوانین نے سب بدل دیا
انہوں نے مزید بتایا کہ ایتیھاد ریل کے ساتھ پاکستان کے مذاکرات جاری ہیں اور مستقبل میں اس شعبے میں مشترکہ کام کے وسیع امکانات موجود ہیں۔
یہ کانفرنس یو اے ای کی وزارت توانائی و انفراسٹرکچر اور ایتیھاد ریل کے تعاون سے منعقد ہوئی جس میں دنیا بھر سے 200 سے زائد نمائش کنندگان اور 20 ہزار سے زیادہ شرکاء نے شرکت کی اور عالمی ریلوے منصوبوں پر تبادلہ خیال کیا گیا۔
