گوگل نیوز پر ہمیں فالو کریںپاکستانی ڈرامہ انڈسٹری کی معروف اداکارہ عائزہ اعوان ان دنوں نیویارک میں چھٹیاں گزار رہی ہیں مگر ان کی تازہ ترین تصاویر سوشل میڈیا پر شدید بحث کا موضوع بن گئی ہیں۔
عائزہ اعوان، جو اپنی پرفارمنس اور خوبصورتی کے باعث ناظرین میں خاصی مقبول ہیں، نے نیویارک کی سڑکوں سے اپنی کچھ تصویریں شیئر کیں۔ تصاویر میں انہیں ڈینم شارٹس کے ساتھ لائلک ہالٹر ٹاپ پہنے دیکھا گیا، جسے ہلکے میک اپ اور جدید ہیر اسٹائل کے ساتھ مکمل کیا گیا تھا۔
ان کی تصاویر سامنے آتے ہی سوشل میڈیا پر ملے جلے ردعمل دیکھنے کو ملے۔ کچھ صارفین نے عائزہ اعوان کے اعتماد اور اسٹائل کو سراہا جبکہ بڑی تعداد نے انہیں کڑی تنقید کا نشانہ بنایا۔
ناقدین کا کہنا تھا کہ اداکارہ کا لباس پاکستانی ثقافتی اور مذہبی اقدار کے منافی ہے۔ ایک صارف نے لکھاکہ انہیں لگتا ہے اس طرح کے لباس سے ڈراموں میں کردار ملیں گے۔ ایک اور نے کہاکہ انہیں اپنے مذہب اور ملک کی نمائندگی کرنی چاہیے، نہ کہ مغربی انداز اپنانا چاہیے۔
کچھ صارفین نے سخت الفاظ بھی استعمال کیے اور ان کے فیشن سینس پر سوال اٹھاتے ہوئے انہیں پینڈو قرار دیا۔
دوسری جانب عائزہ اعوان کے مداحوں کی ایک بڑی تعداد نے ان کا دفاع کیا اور کہا کہ اداکارہ کو اپنی ذاتی زندگی اور فیشن کے حوالے سے آزادانہ فیصلے کرنے کا حق ہے۔ ان کے مطابق، جب فنکار ذاتی وقت گزار رہے ہوں تو ان کی نجی زندگی پر تنقید نہیں ہونی چاہیے۔
یہ پہلی بار نہیں ہے کہ کسی پاکستانی اداکارہ کو غیر ملکی دورے پر پہنے گئے لباس کے باعث تنقید کا سامنا کرنا پڑا ہوتاہم عائزہ اعوان کے مداحوں کا ماننا ہے کہ ان کے فن اور کام کو ان کی ذاتی زندگی سے الگ رکھنا چاہیے۔
