گوگل نیوز پر ہمیں فالو کریںاسلام آباد: چین کے وزیرِ خارجہ وانگ ای جمعرات کو پاکستان پہنچیں گے، جہاں وہ چھٹے پاک چین وزرائے خارجہ اسٹریٹجک ڈائیلاگ کی مشترکہ صدارت کریں گے۔
ترجمان دفترِ خارجہ کے مطابق یہ دورہ ڈپٹی وزیراعظم و وزیرِ خارجہ سینیٹر اسحاق ڈار کی دعوت پر ہو رہا ہے۔ اس اجلاس میں دونوں ممالک کے درمیان سیاسی، اقتصادی، تجارتی اور سیکورٹی تعاون کے مختلف پہلوؤں پر بات چیت ہوگی۔
یہ دورہ پاکستان اور چین کے درمیان اعلیٰ سطح کے روابط کے تسلسل کا حصہ ہے جس کا مقصد دونوں ممالک کے درمیان موسمی اسٹریٹجک شراکت داری کو مزید گہرا کرنا ہے۔
اس موقع پر دونوں ملک اپنے بنیادی مفادات پر باہمی حمایت کے عزم کا اعادہ کریں گے اور علاقائی امن و استحکام کے لیے مشترکہ اقدامات پر بھی غور کریں گے۔
تجزیہ کاروں کے مطابق، چین کے ساتھ یہ ڈائیلاگ خاص طور پر سی پیک منصوبوں، خطے میں بدلتی ہوئی جغرافیائی صورتِ حال اور پاک چین اقتصادی تعلقات کے تناظر میں نہایت اہمیت کا حامل ہے۔
واضح رہے کہ وزیرِ خارجہ وانگ ای اس سے قبل پیر کے روز بھارت بھی پہنچے تھے، جہاں انہوں نے اپنے بھارتی ہم منصب سبرامنیم جے شنکر سے ملاقات کی اور وزیراعظم نریندر مودی سے بھی ملاقات متوقع ہے۔
یہ دورہ اس وقت ہو رہا ہے جب چین اور بھارت کے تعلقات امریکا کی تجارتی پابندیوں اور خطے میں اسٹریٹجک مقابلے کے باعث نئے چیلنجز سے دوچار ہیں۔
پاکستانی حکام کا کہنا ہے کہ وانگ ای کا یہ دورہ پاک چین تعلقات کو نئی جہت دینے اور دونوں ممالک کے درمیان اقتصادی و سیاسی تعاون کو مزید فروغ دینے میں اہم کردار ادا کرے گا۔
