گوگل نیوز پر ہمیں فالو کریںسوڈان کے شمالی دارفور کے دارالحکومت الفاشر میں صورتحال انتہائی سنگین ہوگئی ہے جہاں نیم فوجی تنظیم ریپڈ سپورٹ فورس (RSF) کے قبضے کے بعد ہزاروں شہریوں کے قتل عام اور نسلی بنیادوں پر جنسی زیادتی اور دیگر مظالم کی اطلاعات سامنے آئی ہیں۔
سوڈان ڈاکٹرز یونین کے مطابق شہر میں تقریباً 1,77,000 عام شہری پھنسے ہوئے ہیں جو محفوظ مقامات تک نہیں پہنچ پا رہے۔ تنظیم کا کہنا ہے کہ آر ایس ایف نے نہتے شہریوں پر نسلی بنیادوں پر حملے کیے جن میں ہزاروں لوگ مارے گئے۔
ڈاکٹرز یونین نے اپنی رپورٹ میں انکشاف کیا کہ بے شمار شہریوں کو زندہ جلایا گیا کچھ کو زبردستی اپنی قبریں کھودنے اور خود کو دفنانے پر مجبور کیا گیا۔ شہر میں گھروں پر حملے، خواتین سے جنسی زیادتی اور موقع پر ہی قتل کے واقعات کی تصدیق ہوئی ہے۔
رپورٹ کے مطابق، صرف چند گھنٹوں میں دو ہزار کے قریب افراد مارے گئے جب آر ایف ایس نے اتوار کے روز شدید لڑائی کے بعد الفاشر شہر پر مکمل قبضہ کر لیا۔ یہ شہر مئی 2024 سے آر ایس ایف کے محاصرے میں تھا۔
ڈاکٹرز یونین کے مطابق شہر سے بچ نکلنے والے شہریوں کو بھی نشانہ بنایا گیا۔ جو لوگ گاڑیوں میں فرار ہونے کی کوشش کر رہے تھے انہیں ان کی گاڑیوں سمیت جلا دیا گیا۔
بین الاقوامی اداروں کے مطابق صرف دو دنوں (26 سے 29 اکتوبر) میں 36,000 سے زائد افراد شہر چھوڑنے پر مجبور ہوئے جبکہ 28,000 افراد اب بھی شمالی دارفور کے دوسرے علاقوں میں پناہ تلاش کر رہے ہیں۔
سب سے دل دہلا دینے والا واقعہ الفاشر کے سعودی اسپتال میں پیش آیا، جہاں آر ایس ایف اہلکاروں نے 450 سے زائد زخمیوں اور مریضوں کو موقع پر ہی گولی مار کر ہلاک کر دیا۔ اسی دوران 1,200 سے زیادہ بزرگ، مریض اور طبی عملہ بھی مختلف میڈیکل مراکز میں مارے گئے۔
عالمی ادار صحت کے مطابق جنگ کے آغاز (اپریل 2023) سے اب تک آر ایس ایف کے حملوں میں 1,200 سے زیادہ طبی عملے اور مریض مارے گئے جبکہ 400 سے زائد زخمی ہوئے۔
ڈاکٹرز یونین نے اس صورتحال کو نسل کشی، نسلی صفایا (Ethnic Cleansing) اور انسانیت کے خلاف سنگین جرائم قرار دیا ہے۔ ان کا کہنا ہے کہ یہ دارفور میں آر ایس ایف کے جاری مظالم کا تسلسل ہے۔
بیان میں عالمی برادری اور انسانی حقوق کی تنظیموں سے اپیل کی گئی ہے کہ وہ فوری طور پر سوڈان کے شہریوں کو تحفظ فراہم کرنے کے لیے عملی اقدامات کریں۔
یاد رہے کہ سوڈان میں افواج اور آر ایس ایف کے درمیان خانہ جنگی اپریل 2023 سے جاری ہے جس میں اب تک ہزاروں افراد مارے جا چکے ہیں اور 1.5 کروڑ سے زائد افراد بے گھر ہو چکے ہیں۔
