آرمی چیف سے بل گیٹس کا رابطہ، پولیو کے خاتمے اور شعبۂ صحت پر تبادلۂ خیال

راولپنڈی: آرمی چیف جنرل قمر جاوید باجوہ اور مائیکروسافٹ کے شریک بانی بل گیٹس کے مابین ٹیلیفونک رابطے کے دوران پاکستان میں پولیو کے خاتمے سمیت صحت کے شعبے کی مجموعی صورتحال پر گفتگو اور تبادلۂ خیال کیا گیا ہے۔

پاک فوج کے شعبۂ تعلقاتِ عامہ (آئی ایس پی آر) کا کہنا ہے کہ  بل گیٹس نے قومی پولیو مہم اور خاص طور پر معاشرتی و سماجی شخصیات کی شمولیت کے ذریعے پولیو مہم تک رسائی اور کوریج یقینی بنانے پر پاک فوج کے کردار کی تعریف کی۔

یہ بھی پڑھیں:

صدر اور وزیر اعظم کا حضرت امام حسین رضی اللہ عنہ کو خراجِ تحسین

آئی ایس پی آر کا کہنا ہے کہ چیف آف آرمی اسٹاف جنرل قمر جاوید باجوہ نے بل گیٹس اور مائیکرو سافٹ کی پولیو ختم کرنے کے نیک مقصد کیلئے کی گئی کاوشوں کو سراہتے ہوئے انہیں پاکستان کی جانب سے تعاون جاری رکھنے کی یقین دہانی کرائی۔

یاد رہے کہ اس سے قبل آرمی چیف جنرل قمر جاوید باجوہ نے متعلقہ حکام کو پولیو ٹیموں کو اضافی افرادی قوت اور وسائل کی فراہمی یقینی بنانے کی ہدایت کی تھی جس کا مقصد حساس مقامات پر پولیو ٹیموں کی مناسب رسائی یقینی بنانا تھا۔

واضح رہے کہ پاکستان میں پولیو کے قطرے پلانے والی ٹیموں کو آج بھی دشواری کا سامنا ہے۔آرمی چیف نے گزشتہ ماہ نیئشنل ایمرجنسی آپریشن سینٹر کا بھی دورہ کیا تھا جہاں انہیں ملک میں چلائی جانے والی پولیو مہم اور درپیش چیلنجز سے آگاہ کیا گیا۔