بلوچستان، مستونگ میں سی ٹی ڈی سے مقابلے میں 3دہشت گرد ہلاک

کوئٹہ: محکمۂ انسدادِ دہشت گردی (سی ٹی ڈی) نے کارروائی کرتے ہوئے فائرنگ کے تبادلے کے دوران 3 مبینہ دہشت گردوں کو ہلاک کردیا ہے جبکہ یہ کارروائی ہفتے کے روز کی گئی۔

تفصیلات کے مطابق سی ٹی ڈی نے ایک کمپاؤنڈ میں دہشت گردوں کی موجودگی کی خفیہ اطلاع پر کارروائی کرتے ہوئے مستونگ کے علاقے گنج کستوری میں ملزمان پر چھاپہ مارا۔

یہ بھی پڑھیں:

کراچی، پولیو ورکرز پر مبینہ تشدد کا مقدمہ درج

سی ڈی ٹی کا کہنا ہے کہ اہلکاروں کے وہاں پہنچنے پر دہشت گردوں نے فائرنگ شروع کردی۔ مبینہ مقابلے کے دوران 3 دہشت گرد موقعے پر ہلاک ہو گئے جو مختلف جرائم میں ملوث تھے۔

محکمۂ انسدادِ دہشت گردی کا کہنا ہے کہ ہلاک دہشت گردوں کے قبضے سے اسلحہ اور گولہ بارود بھی برآمد ہوا۔ مارے گئے گئے دہشت گرد اغوا برائے تاوان اور ٹارگٹ کلنگ میں ملوث تھے۔

حکام کا کہنا ہے کہ دہشت گردوں کی لاشیں سول ہسپتال کوئٹہ منتقل کردی گئی ہیں۔ سی ٹی ڈی اور پولیس کی حالیہ مشترکہ کارروائی کے دوران 5 دہشت گردوں کو بھی ہلاک کیا گیا تھا۔