گوگل نیوز پر ہمیں فالو کریںہم ٹی وی کا ڈرامہ ڈائن اپنی آخری قسط کے ساتھ اختتام پذیر ہوا اور ناظرین کو ایک طویل سفر کے بعد کئی جذباتی موڑ دیکھنے کو ملے۔
یہ ڈرامہ معروف اداکارہ مہوش حیات کی ٹی وی پر شاندار واپسی ثابت ہوا جس میں فلمی رنگ کے ساتھ بڑے بڑے فنکاروں نے حصہ لیا۔
کہانی انتقام اور قتل و غارت کے گرد گھومتی رہی جہاں نیہال کی زندگی کے نشیب و فراز نے اسے کمزور لڑکی سے ایک پر اسرار اور خطرناک عورت میں بدل دیا۔
آخری قسط میں دکھایا گیا کہ نیہال ایک ڈائن میں بدل کر اپنے دشمنوں سے بدلہ لیتی ہے۔
اس نے نہ صرف اپنے بیٹے کو واپس حاصل کیا بلکہ زوار شاہ کے خاندان کے تمام افراد کو ان کے کیے کی سزا دی تاہم حیران کن طور پر اس نے اپنے والدین کو چھوڑ دیا۔ یہی وہ نکتہ ہے جس پر ناظرین نے شدید ردعمل دیا۔
کہانی کے مطابق نیہال کے والد نے پہلے حنین کو قتل کیا اور بعد ازاں اپنی بیٹی کو زوار اور شباب کے ہاتھوں بیچ دیا۔
اس سب کے باوجود نیہال نے جب وہ مشنا بن چکی تھی، اپنے والدین کو معاف کر دیا اور ان کے خلاف کوئی کارروائی نہیں کی۔
اس صورتحال نے شائقین میں غصے اور بے چینی کو جنم دیا ہے اور سوشل میڈیا پر عوام کی بڑی تعداد مطالبہ کر رہی ہے کہ نیہال کے والدین کو بھی سزا دی جانی چاہیے تھی۔
