گوگل نیوز پر ہمیں فالو کریںدبئی کے ولی عہد شیخ حمدان بن محمد بن راشد المکتوم نے ایک جامع پالیسی پیکیج کی منظوری دی ہے جس کا مقصد دبئی کو دنیا کے سب سے خوبصورت، قابلِ رہائش اور صحت مند شہروں میں شامل کرنا ہے۔
یہ منصوبے متحدہ عرب امارات کی سالانہ حکومتی میٹنگز 2025 کے دوران پیش کیے گئے جن میں شہری سرسبز ماحول، سستی تعلیم، صحت کی سہولتوں اور ہوابازی کے شعبے میں روزگار جیسے شعبوں پر خصوصی توجہ دی گئی ہے۔
ایگزیکٹو کونسل آف دبئی کے اجلاس میں متعدد ترقیاتی منصوبوں کی منظوری دی گئی، جن میں پبلک پارکس اینڈ گرینری اسٹریٹجی، ایوی ایشن ٹیلنٹ 33 منصوبہ، کم لاگت اسکولوں کی توسیعی پالیسی، اسپورٹس سیکٹر اسٹریٹجک پلان 2033، فنانشل ری اسٹرکچرنگ اینڈ ان سالوینسی کورٹ اور ہیلتھ کیئر میں ابتدائی بیماریوں کی تشخیص کا پروگرام شامل ہیں۔
سبزہ زار اور پارکس:
دبئی میں 800 سے زائد نئے سبز منصوبے شروع کیے جائیں گے جن میں 310 نئے پارکس اور 322 موجودہ پارکس کی تزئین و مرمت شامل ہے۔
منصوبے کے تحت درختوں کی تعداد تین گنا بڑھانے، 187 مربع کلومیٹر سبزہ زار قائم کرنے اور 100 فیصد ری سائیکل پانی کو آبپاشی کے لیے استعمال کرنے کا ہدف رکھا گیا ہے۔
سال 2040 تک 95 ملین پارک وِزٹس کا ہدف ہے جبکہ 80 فیصد آبادی کو پارک تک پانچ منٹ کی مسافت پر سہولت میسر ہوگی۔
ہوابازی کے شعبے میں روزگار:
منصوبہ ایوی ایشن ٹیلنٹ 33 کے تحت دبئی کو عالمی فضائی مرکز کے طور پر مزید مستحکم کیا جائے گا۔ اس پروگرام میں 15 ہزار نئی ملازمتیں، 4 ہزار تربیتی مواقع اور 30 سے زائد اسٹریٹجک شراکت داریوں کا اعلان کیا گیا ہے۔
اس کے ذریعے دبئی کی معیشت کو دوگنا کرنے اور 65 ہزار اماراتی شہریوں کو نجی شعبے میں روزگار دینے کا ہدف بھی مقرر کیا گیا ہے۔
سستی تعلیم کے منصوبے:
دبئی میں 2033 تک 60 نئے سستے اسکول قائم کیے جائیں گے جن میں 1 لاکھ 20 ہزار طلبہ کے لیے نشستیں دستیاب ہوں گی۔ اس پالیسی کے تحت سرکاری فیسوں میں رعایت اور زمین کے کرایے میں کمی جیسے اقدامات کے ذریعے نجی تعلیمی سرمایہ کاری کی حوصلہ افزائی کی جائے گی۔
عالمی اسپورٹس حب:
اسپورٹس سیکٹر اسٹریٹجک پلان 2033 کے تحت دبئی کو دنیا کا سب سے بڑا اسپورٹس حب بنانے کا منصوبہ ہے۔ اس پروگرام میں 17 مختلف کھیلوں پر مشتمل 19 پروگرامز اور 75 عملی اقدامات شامل ہیں، جن کا مقصد بین الاقوامی ایونٹس کی میزبانی، کھلاڑیوں کی تربیت اور عوامی شمولیت میں اضافہ ہے۔
مالیاتی استحکام اور عدالت کا قیام:
نئی فنانشل ری اسٹرکچرنگ اور ان سالوینسی کورٹ کے قیام سے دبئی میں مالیاتی تنظیمِ نو اور دیوالیہ پن کے معاملات کو مؤثر طریقے سے نمٹایا جائے گا۔ اس اقدام سے دبئی کو دنیا کے تین بڑے مالیاتی مراکز میں شامل کرنے کا ہدف ہے۔
ابتدائی بیماریوں کی تشخیص:
صحت کے شعبے میں دبئی نے ابتدائی تشخیصی نظام کے فروغ کے لیے بھی اہم منصوبے منظور کیے ہیں۔ ان کے تحت کولون کینسر کی اسکریننگ میں 40 فیصد اضافہ، ویکسینیشن خدمات میں 50 فیصد بہتری اور مریضوں کی تسلی میں 90 فیصد اضافہ کا ہدف رکھا گیا ہے۔ مزید یہ کہ مریضوں کے انتظار کا وقت 7 دن سے کم کرنے کی پالیسی بھی شامل ہے۔
یہ تمام منصوبے دبئی کو ایک پائیدار، صحت مند، اور خوشحال معاشرے کی جانب گامزن کرنے کے عزم کی عکاسی کرتے ہیں۔نوکریوں کیلئے دبئی حکومت کی ویب سائٹ سے طریقہ کار اور شرائط و ضوبط حاصل کئے جاسکتے ہیں۔
