پورٹ قاسم پر ڈیزل کا جہاز ریت میں پھنسنے کی خبر بے بنیاد ہے۔حکام کی تردید

کراچی: پورٹ قاسم پر ڈیزل بردار جہاز کے متعلق خبر کی تردید کرتے ہوئے حکام کا کہنا ہے کہ ڈیزل کا جہاز ریت میں پھنسنے سے متعلق خبر بے بنیاد ہے۔

تفصیلات کے مطابق آج صبح ساڑھے 7 بجے تیل بردار جہاز دھنسنے کی خبر میڈیا پر نشر کی گئی۔ حکام کا کہنا ہے کہ ڈیزل کا جہاز دھنسنے کی خبروں کا حقیقت سے کوئی تعلق نہیں۔

یہ بھی پڑھیں:

کراچی، پورٹ قاسم کے نزدیک ڈیزل بردار جہاز ریت میں دھنسنے کا دعویٰ

حکام نے بیان جاری کیا ہے کہ آج صبح پورٹ قاسم کے نیوی گیشنل چینل میں داخل ہونے کے دوران 2 بحری جہازوں کے انجنوں میں خرابی پیدا ہوئی تھی جن میں ہائی پروسپیرٹی نامی جہاز بھی شامل ہے۔

بیان کے مطابق دونوں جہازوں کو انتظار گاہ (ویٹنگ ایریا) میں لنگر انداز کردیا گیا ہے جنہیں جلد برتھوں پر بھیجا جائے گا۔ میڈیا پر نشر کی گئی جہاز پھنسنے کی خبریں درست نہیں۔ 

واضح رہے کہ میڈیا پر نشر کی گئی خبر کے مطابق ہائی پروسپیرٹی نامی جہاز ریت میں دھنس گیا تھا، تاہم حکام کا کہنا ہے کہ دونوں جہازوں کے انجنوں میں خرابی آئی جنہیں ویٹنگ ایریا میں رکھا گیا ہے۔