گوگل نیوز پر ہمیں فالو کریںمشہور اداکار فیروز خان نے ایک حالیہ انٹرویو میں کہا ہے کہ وہ کبھی کسی خاتون پر ہاتھ اٹھانے کا تصور بھی نہیں کر سکتے۔
انہوں نے کہا کہ ان پر سابقہ تعلق کے دوران لگائے گئے الزامات جھوٹے تھے اور انہیں غلط فہمی اور خوف کی بنیاد پر ان کے خلاف استعمال کیا گیا۔
فیروز خان نے اپنی پہلی شادی کے حوالے سے بات کرتے ہوئے کہا کہ ان کی علیزہ سلطان کے ساتھ شادی وقت گزرنے کے ساتھ خراب ہوئی اور ماحول زہریلا بن گیا۔
انہوں نے کہا کہ ہر رشتے میں اچھے برے دن آتے ہیں مگر ایک موقع پر حالات غیر معمولی طور پر بگڑ گئے۔
ان کا کہنا تھا کہ انہوں نے کبھی کسی لڑکی کو نقصان پہنچانے یا اس پر تشدد کرنے کا سوچا بھی نہیں، اور نہ ہی وہ ایسے کسی مرد کی حمایت کر سکتے ہیں جو عورت پر ہاتھ اٹھائے۔
انہوں نے مزید کہا کہ ان کے ساتھ کام کرنے والی کوئی بھی اداکارہ بشمول حبا بخاری ان کے خلاف کبھی شکایت نہیں لے کر آئی۔
انہوں نے مردوں سے اپیل کی کہ وہ اپنے گرد موجود خواتین کو ہمیشہ محفوظ، پُراعتماد اور باوقار ماحول فراہم کریں۔
ایک پوڈکاسٹ میں اپنے فنی سفر اور فیصلوں پر بات کرتے ہوئے فیروز خان نے کہا کہ انہیں بہت کم عمری میں شہرت ملی، جس نے انہیں یہ سمجھنے میں مدد دی کہ دولت اور شہرت ان کی اصل ترجیح نہیں۔
انہوں نے کہا کہ وہ اپنی کامیابیوں پر مطمئن ہیں اور ان کا ماننا ہے کہ اگر وہ آج سوشل میڈیا کو مکمل طور پر خیرباد بھی کہہ دیں تو بھی ان کا کیریئر متاثر نہیں ہوگا، کیونکہ لوگ ان کی شخصیت اور کام سے جڑتے ہیں، نہ کہ ان کے آن لائن وجود سے۔
انہوں نے کہا کہ وہ جانتے ہیں کہ زندگی صرف ایک راستے تک محدود نہیں۔ اگر وہ اداکاری نہ بھی کرتے تو کسی اور شعبے جیسے کپڑوں کے کاروبار میں بھی کامیاب ہوسکتے تھے۔ ان کے مطابق جو کامیابی یا مقام ان کی تقدیر میں لکھا ہے وہ انہیں خود بخود مل جائے گا۔
یہ بھی قابلِ ذکر ہے کہ فیروز خان نے 2019 میں عمرہ کی ادائیگی کے بعد شوبز چھوڑنے کا اعلان کیا تھا اور اس عرصے میں وہ متعدد بار مولانا طارق جمیل سے بھی ملاقات کر چکے تھے۔
