پروموشن مانگنا جرم بن گیا، ایف آئی اے کے اے ڈی ایڈمن کا سینئرسپرنٹنڈنٹ پرتشدد

اسلام آباد:ایف آئی اے ہیڈکوارٹرز اسلام آباد میں سینئر سپرنٹنڈنٹ اعجاز احمد پر ایف آئی اے کے اسسٹنٹ ڈائریکٹر ایڈمن زاہد محمود نے اپنے حواریوں کے ساتھ مل کر قاتلانہ حملہ کر دیاجس سے ہیڈ کوارٹر میدان جنگ بن گیا۔

سینئر سپرنٹنڈنٹ اعجاز احمد اپنی پروموشن کے سلسلے میں گزشتہ روز ڈی جی ایف آئی اے واجد ضیا کے سامنے پیش ہوئے اورپروموشن میں بے جا تاخیر اور ایڈیشنل ڈائریکٹر اسٹیبلشمنٹ عصمت اللہ جونیجو کی جانب سے کی جانے والی کارروائیوں کی شکایت کی جس پر ڈی جی ایف آئی اے نے فوری طور پر اعجاز احمد کی شکایات کے ازالے کے احکامات جاری کئے۔

ڈی جی ایف آئی اے سے شکایت کرنے پر ایڈیشنل ڈائریکٹر اسٹیبلشمنٹ عصمت اللہ جونیجو اور ان کے حواری طیش میں آگئے اور گزشتہ روز جب سپرنٹنڈنٹ اعجاز اپنی پروموشن کے مسئلے میں ایڈمن برانچ میں موجود تھے کہ اچانک اسسٹنٹ ڈائریکٹر ایڈمن زاہد محمود نے انہیں گالیاں دینی شروع کر دیں۔

جب اعجاز احمد نے گالیاں دینے کی وجہ پوچھی تو زاہد محمود نے اچانک اس پر قاتلانہ حملہ کر دیا اور اعجاز احمدکو زدوکوب کیا، دوسری جانب موقع پر موجود ایف آئی اے اہلکارایک سینئر سپرنٹنڈنٹ کو بچانے کے بجائے تماشائی بن کر کھڑے رہے۔

ذرائع کا کہنا ہے کہ یہ تمام منصوبہ بندی عصمت اللہ جونیجو ایڈیشنل ڈائریکٹر اسٹیبلشمنٹ نے کی تھی کیونکہ پہلے سے طے شدہ منصوبے کے تحت عصمت اللہ جونیجو نے چھٹی حاصل کر رکھی تھی تاکہ موقع سے خود کو غیر حاضر ثابت کر سکیں۔

یاد رہے کہ اس وقت ایف آئی اے ہیڈ کوارٹر کو ایڈیشنل ڈائریکٹر اسٹیبلشمنٹ عصمت اللہ جونیجو اور ان کے مداح سراؤں نے یرغمال بنا رکھا ہے اور وہ ہر وقت یا تو ایف آئی اے کے اہلکاروں کیخلاف سازشوں میں مصروف رہتے ہیں یا پھر ان کیخلاف محکمانہ انکوائری شروع کرانے میں ہمہ وقت مصروف رہتے ہیں۔

تمام اہلکاروں نے ڈی جی ایف آئی اے سے اپیل کی ہے کہ ایڈیشنل ڈائریکٹر اسٹیبلشمنٹ عصمت اللہ جونیجو،زاہد محمود اور اس کے تمام حواریوں کو ایڈمن سے فوری طور پر ہٹا کر ان کے خلاف تادیبی کارروائی کی جائے۔