گوگل نیوز پر ہمیں فالو کریںلاہور: پنجاب حکومت نے صوبے کے بے روزگار نوجوانوں کو روزگار فراہم کرنے کے لیے ایک اہم اقدام اٹھاتے ہوئے گرین ای ٹیکسی اسکیم 2025 کا باضابطہ آغاز کردیا ہے۔
اس منصوبے کا مقصد نوجوانوں کو برقی اور ہائبرڈ ٹیکسیاں فراہم کرکے انہیں خود کفیل بنانا اور ماحولیاتی آلودگی میں کمی لانا ہے۔
ذرائع کے مطابق اس اسکیم کے پہلے مرحلے میں 1100 برقی ٹیکسیاں فراہم کی جائیں گی جن میں سے 30 گاڑیاں صرف خواتین کے لیے مختص کی گئی ہیں۔
یہ منصوبہ وزیراعلیٰ پنجاب مریم نواز شریف کی سربراہی میں شروع کیا گیا ہے اور صوبائی حکومت کے ماحول دوست پالیسیوں اور روزگار کے مواقع بڑھانے کے عزم کی عکاسی کرتا ہے۔
اہلیت کے معیار
اس اسکیم سے استفادہ کرنے کے لیے درخواست گزار کا پاکستانی شہری اور پنجاب کا ڈومیسائل ہونا لازمی ہے۔ عمر کی حد 21 سے 45 سال مقرر کی گئی ہے۔
درخواست گزار کے پاس درست کمپیوٹرائزڈ قومی شناختی کارڈ اور ڈرائیونگ لائسنس ہونا ضروری ہے۔ صرف کم آمدنی والے افراد درخواست دے سکتے ہیں جبکہ مجرمانہ ریکارڈ یا زیادہ آمدنی والے افراد کو نااہل قرار دیا جائے گا۔
درکار دستاویزات
درخواست کے لیے شناختی کارڈ، ڈرائیونگ لائسنس، پاسپورٹ سائز تصویر، ڈومیسائل یا یوٹیلیٹی بل کی صورت میں رہائش کا ثبوت اور بینک اکاؤنٹ کی تفصیلات لازمی ہوں گی۔ جو افراد ایک سے زیادہ گاڑیوں کے لیے درخواست دیں گے انہیں این ٹی این یا کاروباری اسناد فراہم کرنا ہوں گی۔
درخواست کا طریقہ کار
اسکیم میں درخواست دینے کا عمل مکمل طور پر آن لائن ہے۔ امیدواروں کو سرکاری پورٹل پر رجسٹریشن کرکے شناختی کارڈ نمبر اور موبائل نمبر درج کرنا ہوگا۔
او ٹی پی تصدیق کے بعد شہر اور گاڑی کی قسم (برقی یا ہائبرڈ) کا انتخاب کیا جائے گا اور درکار دستاویزات اپ لوڈ کرنی ہوں گی۔
منظوری ملنے پر بینک سے متعلقہ کارروائیاں مکمل کرکے ڈیلیوری شیڈول جاری کیا جائے گا۔ حکومت نے امیدواروں پر زور دیا ہے کہ وہ جلد درخواست دیں کیونکہ حتمی تاریخ سرکاری پورٹل کے ذریعے جاری کی جائے گی۔
ادائیگی کا ڈھانچہ
منصوبے میں آسان ڈاؤن پیمنٹ، ماہانہ اقساط اور ادائیگی مکمل ہونے پر مکمل ملکیت کی سہولت شامل ہے۔ درست مالی تفصیلات باضابطہ افتتاح کے موقع پر ظاہر کی جائیں گی۔
