گوگل نیوز پر ہمیں فالو کریںجنوبی افریقہ کے شہر جوہانسبرگ سے تقریباً 46 کلومیٹر مغرب میں واقع بیکرزڈال ٹاؤن شپ میں ایک لائسنس یافتہ ٹیورن (بار) پر مسلح افراد کی اندھا دھند فائرنگ سے کم از کم 9 افراد ہلاک اور 10 زخمی ہو گئے۔ یہ واقعہ اتوار کی صبح تقریباً 1 بجے (مقامی وقت) پیش آیا اور ملک میں تین ہفتوں کے اندر دوسرا ماس شوٹنگ کا واقعہ ہے۔
پولیس کے مطابق تقریباً 12 نامعلوم مسلح حملہ آور دو گاڑیوں، ایک سفید وین (کومبی) اور ایک سلور سیڈان میں آئے اور کوا نوکسولو ٹیورن کے اندر موجود لوگوں پر رائفل اور ہینڈ گنز سے فائرنگ شروع کر دی جس کے نتیجے میں 7 مرد اور 2 خواتین ہلاک جبکہ متعدد افراد زخمی ہوئے جنہیں فوری طور پر اسپتال منتقل کر دیا گیا۔
جوہانسبرگ پولیس نے حملہ آوروں کی گرفتاری کے لیے وسیع سرچ آپریشن شروع کردیا ہے۔ کرائم سین مینجمنٹ ٹیمیں، کرائم انٹیلی جنس افسران اور فرانزک ٹیمیں جائے وقوعہ پر شواہد اکٹھا کر رہی ہیں اور گواہوں کے بیانات ریکارڈ کیے جا رہے ہیں۔ حملے کا مقصد ابھی تک واضح نہیں ہو سکا اور تحقیقات جاری ہیں۔
واقعہ کے دوران حملہ آوروں نے مقتولین کے موبائل فونز اور دیگر قیمتی سامان بھی چھین لیا ہلاک ہونے والوں میں ایک آن لائن رائیڈ ہیلنگ سروس کا ڈرائیور بھی شامل ہے جو ٹیورن کے باہر موجود تھا۔
پولیس حکام نے ٹیورن مالکان کو سیکیورٹی بڑھانے کی ہدایت دی ہے جس میں داخلی دروازوں پر سیکیورٹی گارڈز اور باقاعدہ گشت شامل ہیں۔ یہ علاقے میں دو ہفتوں کے اندر دوسرا ایسا واقعہ ہے۔
جنوبی افریقہ میں حالیہ برسوں میں ٹیورنز اور شیبینز (بارز) پر ماس شوٹنگ کے واقعات میں اضافہ دیکھا گیا ہے جو ملک میں بلند قتل کی شرح کو ظاہر کرتا ہے۔ دسمبر کے شروع میں پریٹوریا کے قریب ایک غیر قانونی بار پر فائرنگ میں 12 افراد ہلاک ہوئے تھے۔
