گوگل نیوز پر ہمیں فالو کریںبھارتی ریاست گجرات کے ایک چھوٹے سے گاؤں سے تعلق رکھنے والے گنیش برائیا نے اپنی پیدائشی بیماری کے باوجود وہ کر دکھایا جو بہت سے لوگوں کے لیے ناممکن لگتا تھا۔ پیدائشی طور پر انہیں ہائپو کونڈروپلازیا نامی نایاب ہڈیوں کی بیماری تھی جس کی وجہ سے ان کا قد صرف 3 فٹ (91 سینٹی میٹر) تھا۔
3 foot tall Dr Ganesh Baraiya from India was initially rejected for med school due to his height. After a successful appeal through India’s Supreme Court, he completed his medical degree where he works as a Government Medical Officer 👏pic.twitter.com/ckAgtxeDSr
— Keith Siau (@drkeithsiau) December 1, 2025
میڈیکل کالج میں داخلے سے انکار
2018 میں جب گنیش نے این ای ای ٹی کا امتحان پاس کر کے گجرات کے بی جے میڈیکل کالج احمد آباد میں داخلہ لینے کی کوشش کی تو میڈیکل کونسل آف انڈیا (اب نیشنل میڈیکل کمیشن) نے انہیں جسمانی معذوری کی بنیاد پر داخلہ دینے سے انکار کر دیا۔ کونسل کا کہنا تھا کہ اتنا کم قد ہونے کی وجہ سے وہ مریضوں کا علاج یا سرجری نہیں کر سکیں گے۔
قانونی جدوجہد اور کامیابی
گنیش نے ہمت نہیں ہاری اور گجرات ہائی کورٹ میں درخواست دائر کی۔ طویل قانونی لڑائی کے بعد 2020 میں ہائی کورٹ نے فیصلہ سنایا اور کالج کو انہیں داخلہ دینے کا حکم دیا۔ عدالت نے کہا کہ قد کی کوئی حد مقرر نہیں کی جا سکتی اور معذوری صلاحیت کی راہ میں رکاوٹ نہیں بن سکتی ہے۔
پانچ سال کی محنت اور مشکلات
داخلہ ملنے کے بعد بھی گنیش کے لیے سفر آسان نہیں تھا۔کلاس روم میں عام بنچ ان کے لیے بہت اونچے تھے اس لیے کالج نے ان کے لیے خصوصی چھوٹے بنچ اور اسٹول کا انتظام کیا جبکہ لیبارٹری میں آلات تک پہنچنے کے لیے بھی خصوصی اسٹول مہیا کیے گئے۔
عملی کلاسوں اور اسپتال کی ڈیوٹی کے دوران ساتھی طلبہ اور اساتذہ نے ہمیشہ ان کا ساتھ دیا۔ گنیش نے بتایا کہ شروع میں کچھ لوگ ہنستے تھے لیکن جب انہوں نے میری لگن دیکھی تو سب مدد کرنے لگے۔
خواب کی تکمیل
رواں سال میں گنیش برائیا نے بی جے میڈیکل کالج سے ایم بی بی ایس کی ڈگری مکمل کر لی۔ اب وہ ایک مکمل اہل ڈاکٹر ہیں اور مستقبل میں بچوں کے ڈاکٹر (پیڈیاٹریشن) بننا چاہتے ہیں۔
گنیش کا کہنا ہے کہ میں خود ایک معذور بچہ رہا ہوں اس لیے مجھے پتہ ہے کہ ایسے بچوں کو کتنی ہمت اور مدد کی ضرورت ہوتی ہے۔ میں انہی کی خدمت کرنا چاہتا ہوں۔
ان کا کہنا ہے کہ قد چھوٹا ہو سکتا ہے لیکن حوصلہ اور خواب کبھی چھوٹے نہیں ہونے چاہئیں۔ گنیش برائیا آج نہ صرف اپنے خاندان اور گاؤں بلکہ پورے ملک کے لیے ایک زندہ مثال ہیں کہ اگر لگن ہو تو کوئی دیوار ناممکن نہیں ہوتی۔
