راولپنڈی میں افسوسناک واقعہ، گھر میں آتشزدگی سے میاں بیوی اور بچہ جاں بحق

راولپنڈی: گھر میں گیس لیکیج سے آتشزدگی کے افسوس ناک واقعہ کے سبب میاں بیوی اور بچہ اپنی زندگیوں سے ہاتھ دھو بیٹھے۔

تھانہ روات کی حدود میں گھر کے اندر گیس لیکیج کے سبب آتشزدگی سے میاں، بیوی اور بچہ جاں بحق ہوگئے۔ذرائع کے مطابق آگ نے گھر کا بیشتر حصہ اپنی لپیٹ میں لے لیا تھا۔

ذرائع کا اس حوالے سے مزید کہنا ہے کہ یہ افسوس ناک واقعہ راولپنڈی کی نجی ہاؤسنگ سوسائٹی کے فیز سیون میں رونما ہوا، جاں بحق ہونے والوں میں والد عمر احسان، والدہ انعم احسان اور ان کا بچہ شامل ہیں۔

ریسکیو 1122 نے موقع پر پہنچ کر تمام لاشوں کو ڈسٹرکٹ ہیڈ کوارٹرز ہسپتال راولپنڈی منتقل کردیا جب کہ پولیس نے واقعہ کی تحقیقات شروع کردی ہیں۔کہ آیا گیس لیکیج کی اصل وجوہات کیا تھیں اور آگ کیسے لگ گئی۔