الیکشن کمیشن کے آج کے فیصلے سے خوشی ہوئی، پرویز الہٰی

لاہور: اسپیکر پنجاب اسمبلی چوہدری پرویز الہٰی کا کہنا ہے کہ الیکشن کمیشن کے آج کے فیصلے سے خوشی ہوئی ہے۔

تفصیلات کے مطابق پاکستان تحریک انصاف کے منحرف اراکین سے متعلق الیکن کمیشن کے فیصلے پر ردعمل دیتے ہوئے چوہدری پرویز الہٰی نے کہا کہ آج کے فیصلے کی بہت خوشی ہوئی ہے، الیکشن کمیشن کو مبارک باد پیش کرتا ہوں، حق اور سچ کی فتح ہوئی ہے۔

اُن کا کہنا تھا کہ الیکشن کمیشن کے فیصلے پر عمران خان کو بھی مبارکباد دیتا ہوں، معاملے کے آخر تک جانا ہی اصل لیڈر کا کام ہوتا ہے۔

یہ بھی پڑھیں: پوری قوم یک جان دو قالب ہو کر فیصلہ کرے تو ملک کی تقدیر بدل جائے گی، وزیراعظم

پرویز الہٰی نے کہا کہ الیکشن کمیشن آج نوٹیفکیشن جاری کردے گا، جس کے بعد اکثریت ہماری ہوجائے گی، مسلم لیگ ن کی فلم ناکام ہوگئی ہے، ایک نئی فلم بنی ہے ساری صورتحال سامنے آئے گی، ہم چاروں صوبوں کی اسمبلیاں ایک پیج پر ہیں، الیکشن ہوگا تو وفاق کا ہوگا، ہماری مدت باقی ہے۔

انہوں نے مزید کہا کہ صوبائی اسمبلیاں توڑنے کے معاملے میں سب مل کر بات کریں گے، آج ملتان میں عمران خان نے لانگ مارچ کی تاریخ دینی ہے، عمران خان ہمارے لیڈر ہیں ہم مل کر بات کریں گے۔