بھارتی بیس بال ٹیم اگلے سال پاکستان کا دورہ کرے گی

لاہور: بھارتی بیس بال ٹیم آئندہ سال منعقد ہونے والے ساؤتھ ایشین گیمز میں شرکت کے لیے پاکستان آئے گی۔

کنفیڈریشن آف پروفیشنل بیس بال/سافٹ بال ان انڈیا نے آئندہ جنوبی ایشیائی کھیلوں میں ٹیم کی شرکت کی تصدیق کر دی ہے۔

پاکستان اولمپک ایسوسی ایشن کو لکھے گئے خط میں سی پی بی آئی کے سیکریٹری منوج کوہلی نے اپنی فیڈریشن کی جانب سے تصدیق کی کہ بھارت ساؤتھ ایشین گیمز میں حصہ لے گا۔

مزید پڑھیں:مسلمان کھلاڑی کا روزہ افطار، فٹ بال میچ روک دیا گیا

خط میں مزید کہا گیا کہ ہم بطور فیڈریشن اس بات کی تصدیق کرتے ہیں کہ ٹیم یقینی طور پر بیس بال ایونٹ میں شرکت کرے گی۔ہم آپ سے درخواست کرتے ہیں کہ برائے مہربانی ایک سرکاری دعوت نامہ بھیجیں تاکہ ہماری ٹیم وقت پر اپنی تیاری مکمل کر سکے۔

یہاں یہ بات قابل ذکر ہے کہ 14ویں ساؤتھ ایشین گیمز مارچ 2023 میں پاکستان میں منعقد ہوں گی۔ ایونٹ میں پاکستان (میزبان)، بھارت، سری لنکا، بنگلہ دیش، نیپال، مالدیپ اور بھوٹان شرکت کریں گے۔