گوگل نیوز پر ہمیں فالو کریںکراچی میں سرکاری کالجوں کے انٹرمیڈیٹ امتحانات میں نمایاں پوزیشن حاصل کرنے والے طلبہ کو وزیر اعظم کے پروگرام کے تحت الیکٹرک موٹر سائیکلیں انعام میں دی جائیں گی۔
اس حوالے سے کراچی انٹرمیڈیٹ بورڈ کے چیئرمین فقیر محمد لاکھو نے اعلان کیا کہ انسٹیٹیوٹ آف کاسٹ اینڈ مینجمنٹ اکاؤنٹنٹس آف پاکستان (آئی سی ایم اے) نے بھی ان طلبہ کے لیے مکمل فری اسکالرشپس دینے کا اعلان کیا ہے۔
اس موقع پر ایک خصوصی تقریب منعقد کی جائے گی جس میں کراچی کے سرکاری کالجوں کے پوزیشن ہولڈرز طلبہ، ان کے والدین اور مختلف نمایاں شخصیات شریک ہوں گی۔
انعام کے طور پر دی جانے والی الیکٹرک موٹر سائیکلیں پہلے ہی بورڈ کو موصول ہو چکی ہیں تاکہ انہیں طلبہ میں تقسیم کیا جا سکے۔
چیئرمین فقیر محمد لاکھو کے مطابق یہ اقدام وزیر اعظم کے پروگرام کے تحت ہے اور یہ سلسلہ ہر سال 2030 تک جاری رہے گا۔ یاد رہے کہ وزیر اعظم شہباز شریف نے ملک بھر کے ہونہار طلبہ میں الیکٹرک بائیکس مفت فراہم کرنے کا اعلان کیا تھا۔
ان کی زیر صدارت منعقدہ اجلاس میں ملک میں الیکٹرک گاڑیوں کے فروغ اور عوام کو بائیکس، رکشے اور لوڈر حاصل کرنے میں حکومتی مدد فراہم کرنے کے اقدامات کا جائزہ لیا گیا۔
وزیر اعظم شہباز شریف نے ہدایت کی تھی کہ حکومت کی سطح پر ایک جامع منصوبہ تیار کیا جائے تاکہ عام آدمی کو الیکٹرک گاڑیاں دستیاب ہو سکیں۔
اس موقع پر انہوں نے واضح کیا کہ وفاقی حکومت ملک کے تمام تعلیمی بورڈز بشمول فیڈرل بورڈ کے پوزیشن ہولڈرز طلبہ کو الیکٹرک بائیکس فراہم کرے گی۔
