گوگل نیوز پر ہمیں فالو کریںکراچی میں حال ہی میں متعارف کرائے گئے ای چالان سسٹم نے بدھ کے روز ڈی آئی جی ٹریفک پولیس پیر محمد شاہ کی سرکاری گاڑی کو ٹریفک قوانین کی خلاف ورزی پر جرمانہ عائد کیا۔
پولیس ذرائع کے مطابق ای چالان اس وقت جاری کیا گیا جب ڈی آئی جی ٹریفک کی گاڑی کے ڈرائیور کو سیٹ بیلٹ نہ باندھنے کی خلاف ورزی کرتے ہوئے کیمرے میں محفوظ کیا گیا۔ یہ واقعہ اس وقت پیش آیا جب گاڑی لیاری ایکسپریس وے سے گارڈن انٹرچینج کی جانب اتر رہی تھی۔
پولیس حکام کے مطابق چالان کے وقت ڈی آئی جی ٹریفک پیر محمد شاہ خود گاڑی میں موجود نہیں تھے۔
بعد ازاں پیر محمد شاہ نے تصدیق کی کہ چالان ان کے ڈرائیور کو سیٹ بیلٹ نہ باندھنے پر جاری کیا گیا ہے اور اس کی رقم دس ہزار روپے مقرر کی گئی ہے۔ انہوں نے واضح کیا کہ وہ واقعے کے وقت سرکاری گاڑی میں موجود نہیں تھے۔
کراچی میں ای چالان سسٹم کے تحت شہریوں کے ساتھ ساتھ پولیس کے افسران اور سرکاری گاڑیوں کے خلاف بھی کارروائیاں جاری ہیں، جسے شہری حلقوں میں شفافیت کی علامت قرار دیا جا رہا ہے۔
