سربراہ تحریک لبیک سعد رضوی کیخلاف انسداد دہشت گردی،قتل کامقدمہ درج

لاہور: پولیس نے تحریک لبیک کےسربراہ مولانا سعد حسین رضوی کیخلاف انسداد دہشت گردی،قتل کامقدمہ درج کرلیا، حکومت نے چھوڑنے سے واضح انکار کردیا۔

لاہور کے تھانہ شاہدرہ ٹاؤن میں تحریک لبیک کےسربراہ مولانا سعد حسین رضوی کیخلاف انسداد دہشت گردی اورقتل کے مقدمہ میں 7ATA کے ساتھ 302 کی دفعہ بھی شامل کی گئی ہے۔

لاہور پولیس نے سربراہ تحریک لبیک کو گزشتہ روز لاہور سے گرفتار کیا تھا تاہم آج ان کیخلاف باقاعدہ مقدمہ درج کیا گیا جبکہ اس سے قبل مولانا سعد حسین رضوی کی رہائی کی خبریں بھی زیر گردش تھیں۔

وفاقی وزیرداخلہ شیخ رشید نے آج میڈیا سے گفتگو کرتے ہوئے حالات پر قابو پانے اور نام لئے بغیر کسی کو بھی رہا کرنے سے انکار کردیا تھا جس کے بعد مولانا سعد حسین رضوی کے خلاف مقدمہ درج کیا گیا ہے۔

مزید پڑھیں:شیخ رشید کا سعد رضوی کو چھوڑنے سے انکار، کشیدگی میں اضافہ، پولیس پر حملے جاری

واضح رہے کہ مولانا سعد حسین رضوی کی گرفتاری کے بعد دو روز سے ملک میں جاری احتجاج کے دوران دو افراد جاں بحق اور درجنوں زخمی ہوچکے ہیں جبکہ سرکاری و نجی املاک کو نقصان پہنچانے کا سلسلہ بھی جاری ہے جبکہ سربراہ تحریک لبیک کیخلاف مقدمہ کے اندراج کے بعد مظاہروں میں مزید شدت آگئی ہے۔