غزہ کے مظلوم بچوں سے ملاقات، ملالہ کا فلسطینی پناہ گزینوں کیلئے ایک لاکھ ڈالر عطیہ

انسٹاگرام پر اپنے ایک پیغام میں ملالہ نے اپنے تجربات بیان کرتے ہوئے کہا کہ اگرچہ انہوں نے دنیا بھر میں بچوں کے ساتھ کام کیا ہے، لیکن یہ پہلا موقع تھا کہ ہر بچہ جس سے وہ ملیں یا تو زخمی تھا، یا اس نے کوئی قریبی رشتہ دار کھو دیا تھا، یا اس کا گھر بمباری میں تباہ ہو چکا تھا۔

انہوں نے کہا کہ فلسطینی بچے اس صورتحال کے سب سے بڑے متاثرین ہیں، جسے انہوں نے اسرائیل کی “نسل کشی” قرار دیا۔

ملالہ نے بتایا کہ ان کی ملاقات ایک تین سالہ بچی سے ہوئی جس نے اپنے بہن بھائی کھو دیے، ایک نو عمر لڑکی سے جو اپنے والد کو دوبارہ دیکھنے کی خواہش رکھتی تھی اور ایک اور بچی سے جسے اس قدر صدمہ تھا کہ ذہنی علاج کے بغیر بات بھی نہیں کر پا رہی تھی۔

ملالہ نے کہا کہ یہ بحران تب ہی ختم ہوگا جب جنگ رُکے گی اور زور دیا کہ عالمی سطح پر مسلسل آواز بلند کرنا ناگزیر ہے تاکہ نسل کشی رُک سکے اور متاثرین کی مدد ہو سکے۔

انہوں نے عالمی رہنماؤں سے اپیل کی کہ اسرائیل پر دباؤ ڈالیں تاکہ غزہ کا محاصرہ ختم کیا جائے، امدادی سامان کے لیے راستے کھولے جائیں اور مستقل جنگ بندی عمل میں لائی جائے۔