مریم نواز کی متوقع پیشی، نیب لاہور نے پولیس اور رینجرز سے معاونت کی اپیل کردی

لاہور: قومی احتساب بیورو (نیب) لاہور نے مسلم لیگ (ن) کی نائب صدر اور میاں نواز شریف کی صاحبزادی مریم نواز کی پیشی کے موقع پر پولیس اور رینجرز سے معاونت کی اپیل کردی ہے۔

قومی احتساب بیور (نیب) کے ترجمان نے کہا ہے کہ پاکستان مسلم لیگ نواز کی نائب صدر مریم نواز کی پیشی کے موقع پر نیب لاہور کو ریڈزون ڈیکلیئر کرنے کی درخواست بھی دی جائے گی۔

نیب لاہور کی جانب سے جاری اعلامیے کے مطابق نیب نے مریم نواز کو دو انکوائریز میں 26 مارچ کوپیش ہونے کا نوٹس جاری کررکھا ہے۔

ترجمان نیب کی جانب سے جاری اعلامیے میں کہا گیا ہے کہ مریم نواز کی نیب پیشی کےموقع پرنیب لاہورکی عمارت پرچڑھائی کرنےکی اطلاعات ہیں لہٰذا نیب لاہورنے پولیس اوررینجرزسے معاونت طلب کرلی ہے۔

اعلامیے میں کہا گیا ہے کہ نیب دھمکی یا دباؤ میں آئے بغیرلوٹی گئی رقوم کی واپسی کیلئے کردار ادا کرتا رہےگا۔

ترجمان نیب کے مطابق میڈیا رپورٹس کے مطابق مریم نواز کی پیشی کو سیاسی رنگ دینے کی کوشش کی جارہی ہے۔ ملزمان اور سیاسی جماعتوں کے کارکنوں کی طرف سے نیب لاہورپر چڑھائی کرنے کا پلان بنایا جارہا ہے۔

ترجمان کے مطابق پتھراؤ کرنے اور نیب کو سرکاری فرائض کی انجام دہی میں رکاوٹ پیدا کرنے کی کوشش کی جاسکتی ہے۔ نیب لاہور قانون کےمطابق تمام آئینی اقدامات کرے گا۔

خیال رہے کہ قومی احتساب بیورو (نیب) نے مریم نواز کو 26 مارچ کو طلب کر رکھا ہے جبکہ ن لیگ اور اپوزیشن اتحاد کے کارکنان نے ان کے ساتھ جانے کا اعلان کیا ہے۔