گوگل نیوز پر ہمیں فالو کریںبھارت کے شہر مظفر پور کے مینا پور پولیس دائرہ اختیار سے ایک سنسنی خیز خبر سامنے آئی ہے۔ ایک مسلم خاتون شمسہ بی بی نے ایک ایسی بچی کو جنم دیا ہے جس کے دو سر، چار بازو اور دو ٹانگیں ہیں۔ طبی اصطلاح میں اسے جڑواں بچوں کی پیدائش کہا جاتا ہے جو کہ ایک نہایت نایاب واقعہ ہے۔
بھارتی میڈیا کے مطابق جب شمسہ بی بی کو زچگی کے آثار شروع ہوئے انہیں فوری طور پر ہسپتال منتقل کیا گیا۔ ابتدائی طور پر ڈاکٹروں نے سیزیرین سیکشن کی تجویز دی مگر خاندان کی رضامندی اور ایک معاون نرس مڈوائف (اے این ایم) کی مدد سے نارمل ڈیلیوری کامیابی سے مکمل ہوئی۔
بھارتی میڈیا کا کہنا ہے کہ جیسے ہی بچی کی پیدائش ہوئی ڈیلیوری روم میں ایک عجیب سی خاموشی اور حیرت کی لہر دوڑ گئی۔ دو سر اور چار بازوؤں والی بچی کو دیکھ کر ڈاکٹرز اور خاندان والے ایک لمحے کے لیے سکتے میں آگئے۔ ڈاکٹروں نے وضاحت کی کہ جڑواں بچوں کی یہ حالت اس وقت پیدا ہوتی ہے جب رحم میں جنین مکمل طور پر تقسیم نہیں ہوتا۔
فی الحال بچی کو اسپتال کے انتہائی نگہداشت یونٹ میں داخل کیا گیا ہے جہاں اس کی حالت کی مسلسل نگرانی کی جا رہی ہے۔ ڈاکٹروں کا کہنا ہے کہ آنے والے دنوں میں بچی کے متعدد طبی ٹیسٹ کیے جائیں گے تاکہ یہ معلوم کیا جا سکے کہ اس کے کون سے اعضاء صحیح طریقے سے کام کر رہے ہیں۔
سوشل میڈیا پر بڑی تعداد میں صارفین اس منفرد بچی کی پیدائش کو فطرت کا معجزہ قرار دے رہے ہیں جبکہ ڈاکٹر اسے ایک سائنسی غیر معمولی حالت سمجھتے ہیں۔ بچی کی تصاویر سوشل میڈیا پر گردش کر رہی ہیں جو لوگوں کے لیے تجسس کا باعث بن رہی ہیں۔
