گوگل نیوز پر ہمیں فالو کریںپاکستان میڈیکل اینڈ ڈینٹل کونسل (پی ایم اینڈ ڈی سی) کے زیر اہتمام ہونے والے میڈیکل اینڈ ڈینٹل کالج ایڈمیشن ٹیسٹ (ایم ڈی سی اے ٹی) 2025 کیلئے 140,000 سے زائد امیدواروں نے رجسٹریشن کروالی ہے۔ یہ امتحان ملک بھر میں منعقد کیا جائے گا جبکہ سعودی عرب کے شہر ریاض میں بھی ایک بین الاقوامی مرکز قائم کیا گیا ہے۔
ابتدائی طور پر 5 اکتوبر 2025 کو ہونے والا یہ ٹیسٹ سیلاب متاثرہ علاقوں کے طلبہ کی سہولت کے لیے 26 اکتوبر 2025 (اتوار) تک ملتوی کر دیا گیا ہے۔ سرکاری اعداد و شمار کے مطابق مجموعی طور پر 140,071 امیدواروں نے کامیابی سے رجسٹریشن کرایا ہے۔ امتحان صوبائی یونیورسٹیوں کے ذریعے لیا جائے گا، جبکہ غیر ملکی امیدواروں کے لیے خصوصی انتظامات بھی کیے گئے ہیں۔
رجسٹریشن کی تفصیلات
پنجاب: یونیورسٹی آف ہیلتھ سائنسز (یو ایچ ایس) لاہور کے تحت 50,443 امیدوار
سندھ: سکھر آئی بی اے ٹیسٹنگ سروس کے تحت 33,160 امیدوار
خیبر پختونخوا: خیبر میڈیکل یونیورسٹی پشاور کے تحت 39,964 امیدوار
بلوچستان: بولان یونیورسٹی آف میڈیکل اینڈ ہیلتھ سائنسز کوئٹہ کے تحت 10,278 امیدوار
اسلام آباد: 1,146 امیدوار
آزاد جموں و کشمیر: 3,322 امیدوار
گلگت بلتستان: شہید ذوالفقار علی بھٹو میڈیکل یونیورسٹی اسلام آباد کے تحت 1,564 امیدوار
بین الاقوامی مرکز (ریاض): 194 امیدوار
پنجاب میں سب سے زیادہ رجسٹریشنز ہیں جبکہ خیبر پختونخوا اور سندھ اس کے بعد ہیں۔
پی ایم اینڈ ڈی سی کے مطابق امتحانات صوبائی اور وفاقی یونیورسٹیوں کے ذریعے منعقد کیے جائیں گے نہ کہ خود کونسل کی طرف سے تاہم ریگولیٹر کے طور پر کونسل نے تمام متعلقہ فریقوں سے مشاورت کے بعد ایک یکساں نصاب اور سوالات کا بینک تیار کیا ہے۔
کونسل نے تمام یونیورسٹیوں کو ہدایت کی ہے کہ وہ پی ایم اینڈ ڈی سی کے معیارات پر سختی سے عمل کریں سوالات کی تیاری سے لے کر نتیجوں کے اعلان تک، اور صوبائی اور بین الاقوامی مراکز پر بڑی تعداد کے امیدواروں کے انتظامات کو یقینی بنائیں۔
پی ایم اینڈ ڈی سی اور یونیورسٹیوں نے ایف آئی اے، آئی بی اور پولیس کے ساتھ قریبی رابطے میں رہ کر پیپر لیک یا دھاندلی کی روک تھام کیلئے اقدامات کیے ہیں۔ امیدواروں کو مشورہ دیا گیا ہے کہ وہ صرف پی ایم اینڈ ڈی سی یا یونیورسٹیوں کی سرکاری ہدایات پر عمل کریں اور میڈیا میں پھیلنے والی غلط معلومات سے بچیں۔
کونسل نے خبردار کیا ہے کہ کسی بھی قسم کی دھاندلی پر قانون کے تحت سخت کارروائی کی جائے گی۔ پی ایم اینڈ ڈی سی کے صدر ڈاکٹر ریاض تاج نے تمام یونیورسٹیوں سے امتحان کو شفاف اور ہموار انداز میں منعقد کرنے کی اپیل کی ہے۔
