گوگل نیوز پر ہمیں فالو کریںپاکستان تحریکِ انصاف (پی ٹی آئی) کے بانی اور سابق وزیرِ اعظم عمران خان کی رہائی کے لیے شروع ہونے والی تحریک میں ان کے بیٹے قاسم اور سلیمان خان بھی پیش پیش ہوں گے۔ یہ اعلان عمران خان کی بہن، علیمہ خان نے اسلام آباد میں میڈیا سے گفتگو کرتے ہوئے کیا۔
علیمہ خان کے مطابق، عمران خان کی رہائی کے لیے شروع ہونے والی اس تحریک میں پورا خاندان شامل ہوگا، جس میں قاسم اور سلیمان خان بھی شامل ہیں۔
انہوں نے بتایا کہ دونوں بھائی پہلے امریکہ جائیں گے تاکہ بین الاقوامی سطح پر اپنے والد کے ساتھ ہونے والی ناانصافیوں کے بارے میں آگاہی پیدا کریں، اور پھر پاکستان واپس آ کر اس تحریک میں حصہ لیں گے۔
علیمہ خان نے مزید کہا کہ عمران خان نے جیل سے ہی اس تحریک کی قیادت کرنے کا فیصلہ کیا ہے اور وہ اس بات پر پُرعزم ہیں کہ اس تحریک کو کامیاب بنایا جائے گا۔
انہوں نے کہا کہ عمران خان کا کہنا ہے کہ “جب ایک قوم اپنے حق کے لیے خود کھڑی ہو جاتی ہے تو پھر اس کو کوئی طاقت جھکا نہیں سکتی”۔
یہ تحریک 5 اگست 2025 کو شروع ہوگی، جو کہ عمران خان کی جیل میں قید کے دو سال مکمل ہونے کا دن ہے۔ عمران خان نے اپنے ایک بیان میں کہا ہے کہ “مذاکرات کا وقت گزر چکا ہے، اب صرف عوامی احتجاج ہی واحد راستہ ہے۔
علیمہ خان نے اس بات کی بھی تصدیق کی کہ تحریک میں پی ٹی آئی کے تمام رہنما، کارکنان اور عوامی نمائندے بھرپور شرکت کریں گے۔ انہوں نے کہا کہ عمران خان نے واضح پیغام دیا ہے کہ جو لوگ اس تحریک کا بوجھ نہیں اٹھا سکتے، وہ پیچھے ہٹ جائیں۔
یہ تحریک نہ صرف پاکستان بلکہ دنیا بھر میں مقیم پاکستانیوں کے لیے بھی ایک اہم موقع ہے کہ وہ اپنے قائد کی رہائی کے لیے آواز بلند کریں۔
