گوگل نیوز پر ہمیں فالو کریںپشاور میں کمسن بچی پر تشدد کی وائرل ویڈیو نے سوشل میڈیا پر شدید عوامی غم و غصہ پیدا کیا جس کے بعد پولیس نے فوری ایکشن لیتے ہوئے معاملے کی حقیقت بے نقاب کردی۔
ویڈیو میں دکھائی جانے والی بچی پر مبینہ تشدد کے واقعے نے شہریوں کو جھنجھوڑ کر رکھ دیا تھا تاہم پشاور پولیس کی بروقت کارروائی اور جدید تفتیش کے نتیجے میں یہ انکشاف ہوا کہ ویڈیو میں موجود خاتون دراصل بچی کی سگی والدہ ہے۔
وائرل ویڈیو کا معمہ حل
کمسن بچی فاطفہ گل پر تشدد کی ویڈیو پر عوامی ردعمل کے بعد پشاور پولیس کا فوری ایکشن۔
ایس ایچ او شاہ پور عمران خان نے جدید تفتیش سے خاتون (ص) زوجہ عدنان کو ٹریس کیا، جو بچی کی سگی والدہ نکلی۔
خاتون نے ندامت کا اظہار کرتے ہوئے پولیس و عوام سے معافی مانگی۔ pic.twitter.com/cpQNa8RcUL
— Capital City Police Peshawar (@PeshawarCCPO) October 31, 2025
پولیس کے مطابق ایس ایچ او شاہ پور عمران خان نے ویڈیو میں دکھائی گئی خاتون کی شناخت کے لیے جدید ٹیکنالوجی اور تفتیشی ذرائع استعمال کیے، جس کے بعد خاتون (ص) زوجہ عدنان کو ٹریس کیا گیا۔
ابتدائی تفتیش میں خاتون نے اعتراف کیا کہ ویڈیو میں وہی ہیں اور تشدد کا نشانہ بننے والی بچی ان کی اپنی بیٹی ہے۔
پولیس ذرائع کے مطابق خاتون نے اپنے رویے پر ندامت کا اظہار کرتے ہوئے نہ صرف پولیس بلکہ عوام سے بھی معافی مانگی۔ پولیس نے مؤقف اختیار کیا کہ واقعے کی مکمل تفتیش جاری ہے اور والدین کو بچوں پر تشدد کے سنگین نتائج سے آگاہ کیا جا رہا ہے۔
پشاور پولیس کے اس فوری اقدام کو شہریوں کی جانب سے سراہا گیا ہے، جنہوں نے امید ظاہر کی ہے کہ ایسے واقعات میں قانون کے مطابق کارروائی جاری رہے گی تاکہ مستقبل میں بچوں پر تشدد کے رجحان کی حوصلہ شکنی کی جا سکے۔
