اوگرا نے ایل پی جی 1.66 روپے فی کلو مہنگی کردی

اسلام آباد: آئل اینڈ گیس ریگولیٹری اتھارٹی نے ایل پی جی کی قیمت میں اضافے کا اعلان کردیا ہے۔

تفصیلات کے مطابق اوگرا کی جانب سے جاری نوٹیفکیشن میں کہا گیا ہے کہ جولائی کیلئے ایل پی جی کی قیمت میں فی کلو ایک روپیہ 66 پیسے اضافہ کیا گیا ہے۔

اوگرا نے کہا کہ ایل پی جی کا 11.8 کلو کا گھریلو سلنڈر 19 روپے 62 پیسے مہنگا ہوگیا ہے، ایک کلو ایل پی جی کی نئی قیمت 220 روپے 42 پیسے مقرر کی گئی ہے۔

اوگرا کے مطابق نئی قیمتوں کے اطلاق کے بعد گھریلو سلنڈر کی نئی قیمت 2600 روپے 97 پیسے ہوجائے گی، جون میں ایل پی جی کا گھریلو سلنڈر 2581 روپے 35 پیسے کا تھا۔

یہ بھی پڑھیں:

ملک میں مہنگائی کی شرح 13 سال کی بلند ترین سطح پر پہنچ گئی

دوسری جانب پاکستان کے ادارہ شماریات نے ماہانہ رپورٹ جاری کی ہے، جس کے اعداد و شمار کے مطابق جون میں مہنگائی کی شرح بڑھ کر 21.32 فیصد ہوگئی ہے جو دسمبر 2008 کے بعد مہنگائی کی سب سے زیادہ شرح ہے۔

خیال رہے کہ پاکستان تحریک انصاف کے دورِ حکومت میں زیادہ سے زیادہ مہنگائی کی شرح 14.6 فیصد رہی تھی جبکہ رواں سال مئی کے مقابلے جون میں مہنگائی کی شرح میں 6.34 فیصد کا بڑا اضافہ ہوا۔

پاکستان کے ادارہ شماریات کی جانب سے جاری کردہ رپورٹ میں کہا گیا ہے کہ جون کے مہینے میں مہنگائی کی شرح 6.19 فیصد رہی جبکہ دیہی علاقوں میں 6.57 فیصد رہی۔اعداد و شمار کے مطابق مئی 2022 میں مہنگائی کی شرح 13.76 فیصد تھی جبکہ جون 2021 میں مہنگائی کی شرح 9.7 فیصد تھی۔