گوگل نیوز پر ہمیں فالو کریںلاہور: صوبائی دارالحکومت لاہور میں عوامی ٹرانسپورٹ کا نظام مکمل طور پر بحال کر دیا گیا ہے، اورنج لائن میٹرو ٹرین اور میٹرو بس سروس کئی روز کی بندش کے بعد منگل کے روز دوبارہ شروع ہوگئی۔
ان خدمات کی معطلی سیکورٹی خدشات اور ٹریفک پابندیوں کے باعث کی گئی تھی تاہم حالات معمول پر آنے کے بعد دونوں نظام دوبارہ فعال کر دیے گئے۔
پنجاب ماس ٹرانزٹ اتھارٹی (پی ایم ٹی اے) کے مطابق اورنج لائن میٹرو ٹرین پانچ روز کی بندش کے بعد مکمل روٹ پر بحال کر دی گئی ہے۔
حکام نے بتایا کہ سروس کی معطلی محض حفاظتی اقدام کے طور پر کی گئی تھی تاکہ شہریوں کو کسی ممکنہ خطرے سے بچایا جا سکے۔ اب حالات بہتر ہونے پر ٹرین کی تمام سرگرمیاں معمول کے مطابق جاری ہیں۔
اسی طرح، لاہور میٹرو بس سروس بھی چار روز بعد مکمل طور پر بحال کر دی گئی ہے۔ اتھارٹی کے مطابق، بس سروس کو بھی اسی وجہ سے عارضی طور پر روکا گیا تھا کیونکہ مختلف شاہراہوں پر سیکورٹی الرٹس اور ٹریفک میں رکاوٹیں پیدا ہوگئی تھیں۔
سیکورٹی اور ٹریفک کی صورتحال کا تفصیلی جائزہ لینے کے بعد بس سروس کو دوبارہ شروع کیا گیا ہے تاکہ شہریوں کو آسان اور محفوظ سفری سہولت فراہم کی جا سکے۔
لاہور پولیس کے مطابق، شہر بھر میں امن و امان برقرار ہے اور تمام بازار اور تجارتی مراکز کھلے رہیں گے۔ پولیس نے شہریوں سے اپیل کی ہے کہ وہ بلاخوف اپنے معمولات زندگی جاری رکھیں کیونکہ تمام تجارتی علاقوں میں سیکورٹی کو یقینی بنایا گیا ہے۔
پولیس حکام نے خبردار کیا ہے کہ قانون کی خلاف ورزی کرنے یا امن و امان میں خلل ڈالنے والوں کے خلاف سخت کارروائی کی جائے گی۔ شہری کسی بھی ہنگامی صورتحال میں پولیس ہیلپ لائن 15 پر رابطہ کر سکتے ہیں۔
دوسری جانب، جڑواں شہروں اسلام آباد اور راولپنڈی میں میٹرو بس سروس جزوی طور پر بحال کر دی گئی ہے۔ ابتدائی مرحلے میں بسیں صدر سے کشمیر ہائی وے تک چلائی جا رہی ہیں تاہم فیض احمد فیض اسٹیشن سے پاک سیکریٹریٹ تک کا حصہ تاحال بند ہے۔ یہ بندش سیکورٹی پابندیوں کے باعث برقرار ہے۔
وفاقی دارالحکومت میں سیکورٹی الرٹ کی فضا برقرار ہے۔ پولیس کے مطابق، تمام فورسز کسی بھی ممکنہ ناخوشگوار واقعے سے نمٹنے کے لیے تیار ہیں جبکہ حساس مقامات پر گشت اور نگرانی مزید بڑھا دی گئی ہے۔
