گوگل نیوز پر ہمیں فالو کریںاسلام آباد: پاکستان نے ہفتے کی صبح بھارت کے خلاف بڑے پیمانے پر فوجی آپریشن بنیان المرصوص کا آغاز کر دیا ہے جس کے دوران کئی اسٹرٹیجک تنصیبات کو کامیابی سے نشانہ بنایا گیا، پاکستان کی سرکاری خبر رساں ایجنسی اے پی پی نے سیکورٹی ذرائع کے حوالے سے اس کی تصدیق کی ہے۔
اس آپریشن میں بھارت کے کم از کم سات اہم اہداف کو نشانہ بنایا گیا، جن میں پٹھان کوٹ ایئربیس، اودھم پور فضائی اڈہ، گجرات ایئربیس، راجستھان فضائی اڈہ اور برہموس میزائل ذخیرہ گاہ شامل ہیں۔
یہ کارروائی بھارت کی جانب سے پاکستانی سرزمین پر کیے گئے میزائل حملوں کے ردعمل میں کی گئی جن میں دشمن نے تین پاکستانی فضائی اڈوں کو نشانہ بنانے کی کوشش کی تھی۔
ڈی جی آئی ایس پی آر لیفٹیننٹ جنرل احمد شریف چوہدری نے ایک پریس کانفرنس میں تصدیق کی کہ بھارت نے جمعہ کی شب راولپنڈی میں نور خان ایئربیس، چکوال میں مریض ایئربیس، اور شورکوٹ بیس پر زمین سے فضا میں مار کرنے والے میزائل داغے تاہم خدا کے فضل سے تمام پاکستانی فضائی اثاثے مکمل طور پر محفوظ رہے۔
ڈی جی آئی ایس پی آر نے خبردار کیا کہ پاکستان اس اشتعال انگیزی کا مؤثر جواب دے گا۔ ان کا کہنا تھا: “اب صرف ہمارے جواب کا انتظار کریں۔” انہوں نے مزید انکشاف کیا کہ بھارت نے افغانستان کے اندر بھی میزائل اور ڈرون داغے، جسے علاقائی استحکام کے لیے خطرناک قرار دیا گیا ہے۔
لیفٹیننٹ جنرل احمد شریف کا کہنا تھا کہ بھارت اپنی ہٹ دھرمی اور غرور کے باعث خطے کو عدم استحکام کی طرف دھکیل رہا ہے، لیکن پاکستان نہ صرف اس سے مرعوب نہیں ہوگا بلکہ مکمل قوت سے جواب دے گا۔
اس سے قبل لائن آف کنٹرول (ایل او سی) پر بھارتی جارحیت کے جواب میں پاک فوج نے بھرپور جوابی کارروائی کرتے ہوئے دشمن کی تین مزید چوکیاں تباہ کر دیں۔ اے پی پی کی رپورٹ کے مطابق یہ کارروائی ایک مربوط حکمت عملی کے تحت کی گئی جس میں مختلف سیکٹرز میں دشمن کو بھاری نقصان پہنچایا گیا۔
کِلر سیکٹر میں خالصہ ٹاپ پر واقع مہری پوسٹ کو نشانہ بنایا گیا، جبکہ راکھ چکری سیکٹر میں دانا ٹاپ اور ماونڈ پوسٹ مکمل طور پر تباہ کر دی گئیں۔ ان حملوں نے بھارتی افواج کو مکمل طور پر ہلا کر رکھ دیا ہے اور سیکیورٹی ذرائع کے مطابق بھارت کی دفاعی حکمت عملی میں شدید اضطراب اور انتشار پیدا ہو چکا ہے۔
پاکستانی فوج کی اس کارروائی کو نہ صرف قومی دفاع کا فیصلہ کن موڑ قرار دیا جا رہا ہے بلکہ بین الاقوامی مبصرین اسے جنوبی ایشیا کے دفاعی توازن میں اہم تبدیلی کے طور پر دیکھ رہے ہیں۔
چین جیسے عالمی کھلاڑی اس صورتحال کو انٹیلیجنس کے مواقع کے طور پر استعمال کر رہے ہیں، جبکہ بھارت کو عالمی سطح پر شرمندگی کا سامنا ہے، خصوصاً ایسے وقت میں جب آئی ایم ایف نے پاکستان کو ایک ارب ڈالر کی نئی قسط جاری کر دی ہے۔
پاکستان کا ’بنیان المرصوص‘ آپریشن نہ صرف عسکری سطح پر ایک واضح پیغام ہے بلکہ یہ علاقائی خودمختاری، قومی وقار اور مؤثر دفاع کی عملی تصویر بھی بن چکا ہے۔
