گوگل نیوز پر ہمیں فالو کریںپاکستان اسٹاک ایکسچینج میں بدھ کے روز مسلسل تیسرے روز بھی مثبت رجحان دیکھا جارہا ہے، 100 انڈیکس میں 900 سے زائد پوائنٹس کا اضافہ ہوا اور یہ 157,196.58 پوائنٹس تک پہنچ گیا۔ صبح 9:40 بجے اسٹاک مارکیٹ 156,964.32 پوائنٹس پر ٹریڈ کر رہی ہے جو کہ گزشتہ سیشن کے 156,180.94 پوائنٹس کے مقابلے میں معمولی اضافہ ظاہر کرتی ہے۔
گزشتہ سیشن کا جائزہ
منگل کے روز بھی پاکستان سٹاک ایکسچینج میں مسلسل دوسرے دن تیزی دیکھی گئی۔ 100 انڈیکس میں 796.44 پوائنٹس کا اضافہ ہوا جو کہ 0.51 فیصد کی مثبت تبدیلی کے ساتھ 156,180.94 پوائنٹس پر بند ہوا جبکہ اس سے پچھلے سیشن میں یہ 155,384.50 پوائنٹس پر تھا۔ دن بھر میں 423,098,673 شیئرز کا لین دین ہوا جو کہ گزشتہ دن کے 857,609,724 شیئرز کے مقابلے میں کم تھا۔ شیئرز کی کل مالیت 27.786 ارب روپے رہی جو کہ پچھلے دن کی 32.724 ارب روپے سے کم تھی۔
اسٹاک مارکیٹ میں 483 کمپنیوں کے شیئرز کا لین دین ہوا جن میں سے 280 نے منافع حاصل کیا، 178 کو نقصان اٹھانا پڑا، جبکہ 25 کمپنیوں کے شیئرز کی قیمتیں مستحکم رہیں۔ سرمایہ کاروں کی توجہ اہم شعبوں جیسے کہ آٹوموبائل اسمبلرز، کمرشل بینکوں، سیمنٹ، کھاد، تیل و گیس کی تلاش، آئل مارکیٹنگ کمپنیوں، بجلی پیدا کرنے والی کمپنیوں اور ریفائنری سیکٹرز کی جانب رہی۔
عالمی مارکیٹ کا تناظر
عالمی سطح پر منگل کے روز ایشیائی سٹاک مارکیٹوں میں اضافہ دیکھا گیا، جبکہ امریکی ڈالر کی قدر میں کمی آئی۔ سرمایہ کاروں کا خیال ہے کہ امریکی فیڈرل ریزرو اس ہفتے اپنی شرح سود میں نرمی کی پالیسی دوبارہ شروع کرسکتا ہے جس سے مستقبل میں مزید شرح سود میں کٹوتی کا امکان ہے۔
