گوگل نیوز پر ہمیں فالو کریںشارجہ: پاکستان اور متحدہ عرب امارات (یو اے ای) کی ٹیمیں آج شارجہ میں ٹی ٹوئنٹی ٹرائی سیریز کے اہم میچ میں آمنے سامنے ہوں گی۔ میچ پاکستانی وقت کے مطابق رات 8 بجے شروع ہوگا۔
پاکستان پوائنٹس ٹیبل پر سرفہرست ہونے کے باوجود افغانستان کے ہاتھوں 18 رنز کی شکست کے بعد دباؤ برداشت کرنے کی صلاحیت پر سوالات کا سامنا کر رہا ہے۔ 170 رنز کے تعاقب میں ناکامی نے ایک بار پھر ٹیم کی غیر مستقل مزاجی کو اجاگر کیا۔
یو اے ای کے خلاف پاکستان کو اس بات سے حوصلہ ہوگا کہ پچھلے میچ میں اس نے 207 رنز اسکور کیے تھے، جہاں صائم ایوب نے 69 اور حسن نواز نے 56 رنز کی برق رفتار اننگز کھیلی تاہم آخری اوورز میں بیٹنگ لائن کے اچانک ڈھیر ہونے نے مینجمنٹ کے لیے تشویش پیدا کر دی ہے۔
یو اے ای کی بولنگ نے بھی 200 سے زائد رنز کے باوجود اثر دکھایا، جہاں جنید صدیقی اور صغیر خان نے تین تین وکٹیں حاصل کیں۔ ان کے کپتان محمد وسیم، آصف خان اور ایتھن ڈی سوزا بیٹنگ لائن کو مضبوط بناتے ہیں لیکن اصل چیلنج پاکستان کی فاسٹ بولنگ جوڑی شاہین شاہ آفریدی اور حارث رؤف کا سامنا ہوگا، جو پچھلے میچ میں آرام پر تھے اور آج کے میچ میں واپسی کر سکتے ہیں۔
یہ میچ پاکستان کے لیے صرف پوائنٹس کا نہیں بلکہ اپنی کمبی نیشنز بہتر بنانے، اعتماد بحال کرنے اور فائنل کے لیے تیاری کرنے کا موقع ہے۔ دوسری طرف یو اے ای کے لیے یہ مقابلہ گھریلو میدان پر اپ سیٹ کر کے ٹورنامنٹ میں نئی جان ڈالنے اور اپنے شائقین کو خوش کرنے کا سنہری موقع ہوگا۔
پاکستان ٹیم میں سلمان آغا (کپتان)، صائم ایوب، فخر زمان، صاحبزادہ فرحان، حسن نواز، سلمان مرزا، محمد حارث، محمد نواز، شاہین شاہ آفریدی، حارث رؤف، حسن علی، حسین طلعت، صوفیان مقیم، ابرار احمد، خوشدل شاہ، فہیم اشرف اور محمد وسیم شامل ہیں۔
متحدہ امارات کی ٹیم میں محمد وسیم، آصف خان، راہول چوپڑا، آریانش شرما، ایتھن ڈی سوزا، علیشان شرفو، ہرشت کوشک، محمد فاروق، دھروو پرشار، جنید صدیقی، محمد جواد اللہ، حیدر علی، محمد روحید، محمد ذوہیب اور صغیر خان شامل ہیں۔
