گوگل نیوز پر ہمیں فالو کریںپاکستانی فلم موکلانی؛ دی لاسٹ موہاناز نے دنیا کے معتبر ترین ماحولیاتی فلمی ایوارڈز میں سے ایک جیکسن وائلڈ میڈیا ایوارڈ جیت کر ملک کے لیے ایک تاریخی اعزاز حاصل کرلیا۔ یہ پہلا موقع ہے کہ پاکستان کی کسی فلم نے جیکسن وائلڈ میڈیا ایوارڈز میں کامیابی حاصل کی ہے جسے دنیا بھر میں ماحولیاتی اور جنگلی حیات کی کہانیوں کیلئے آسکرز کہا جاتا ہے۔
عالمی مقابلے میں سینکڑوں فلموں کو پیچھے چھوڑا
فلم کو گلوبل وائسز کیٹیگری میں ایوارڈ سے نوازا گیا جہاں اسے دنیا بھر سے بھیجی گئی 500 سے زائد فلموں کے مقابلے میں منتخب کیا گیا۔ یہ ایوارڈ امریکہ میں ہونے والی ایک تقریب میں دیا گیا جس میں 200 سے زائد بین الاقوامی ماہرین نے تقریباً 1000 گھنٹوں پر مشتمل مواد کا جائزہ لیا۔
موہانا برادری کی زندگی پر مبنی ایک دستاویزی فلم
یہ فلم سندھ کے تاریخی منچھر جھیل کے کنارے رہنے والی موہانا برادری کی کہانی ہے جو صدیوں سے کشتیوں پر بسیرا کیے ہوئے ہیں۔ فلم میں دکھایا گیا ہے کہ قدیم ماہی گیر برادری اب آلودگی، ماحولیاتی تبدیلی اور جھیل کے سکڑنے جیسے سنگین خطرات کا سامنا کر رہی ہے جو ان کے وجود اور ثقافت کو مٹا دینے کے قریب ہیں۔
جواد شریف کی ہدایتکاری میں عالمی سطح پر پذیرائی
فلم کے ہدایتکار اور پروڈیوسر جواد شریف اس سے پہلے بھی اپنی فلموں K2 and the Invisible Footmen، Indus Blues اور Natari کے ذریعے عالمی سطح پر پذیرائی حاصل کرچکے ہیں۔
جواد شریف کا کہنا ہے کہ یہ ایوارڈ موہانا برادری کا ہے جن کی کہانی دنیا کے سامنے لانا میرا مقصد تھا۔ یہ صرف ایک فلم نہیں، بلکہ ماحولیاتی اور ثقافتی بحران پر ایک اہم پیغام ہے۔
ایوارڈ کی اہمیت کیا ہے؟
جیکسن وائلڈ میڈیا ایوارڈز 1991 میں امریکہ میں قائم کیے گئے اور یہ دنیا کے 60 سے زائد ممالک سے فلمیں وصول کرتے ہیں۔ ان کا مقصد ایسے فلم سازوں کو سراہنا ہے جو ماحولیاتی تحفظ اور فطرت سے متعلق آگاہی کو مؤثر انداز میں پیش کریں۔
اس سال موکلانی کو دنیا بھر سے بھیجی گئی فلموں کے درمیان سب سے منفرد، بااثر اور دل کو چھو لینے والی کہانی قرار دیا گیا۔
موکلانی؛ دی لاسٹ موہاناز کی کامیابی صرف ایک فلم کی جیت نہیں بلکہ پاکستان کے ثقافتی اور ماحولیاتی تنوع کی بین الاقوامی سطح پر پہچان ہے۔ یہ فلم اس بات کا ثبوت ہے کہ اگر کہانی سچی ہو پیشکش خالص ہو اور نیت مضبوط ہو تو عالمی اسٹیج پر بھی آواز سنی جا سکتی ہے۔
