گوگل نیوز پر ہمیں فالو کریںپاکستانی شہری جو بیرونِ ملک روزگار کے لیے جانا چاہتے ہیں، اب انہیں PakSkills پلیٹ فارم پر رجسٹریشن کروانا لازمی ہوگا۔ بغیر رجسٹریشن کے پاسپورٹ پر پروٹیکٹر جاری نہیں کیا جائے گا۔
وزارتِ اوورسیز پاکستانیز نے یہ اقدام انسانی اسمگلنگ کے خطرات کو کم کرنے کے لیے متعارف کرایا ہے۔ یہ نیا ضابطہ 19 نومبر سے نافذ العمل ہوگا۔
وزارت کے مطابق PakSkills ایپ پر رجسٹریشن مفت ہے۔ بیرونِ ملک نوکری کے خواہشمند درخواست دہندگان کو اپنی مکمل ذاتی معلومات فراہم کرنی ہوں گی، جن میں CNIC اور پاسپورٹ نمبر، تعلیمی قابلیت اور مجوزہ بیرونِ ملک روزگار کی تفصیلات شامل ہیں۔
وزارت نے واضح کیا کہ PakSkills سرٹیفیکیٹ کے بغیر کوئی پروٹیکٹر جاری نہیں ہوگا۔ حکام کا کہنا ہے کہ یہ قدم انسانی اسمگلنگ اور بیرونِ ملک روزگار کے ساتھ منسلک خطرات کو کم کرنے میں مددگار ثابت ہوگا۔
قبل ازیں وفاقی تحقیقاتی ادارے (FIA) نے بھی بیرونِ ملک روزگار کے لیے سفر کرنے والے پاکستانیوں کے لیے نیا ضابطہ نافذ کیا تھا، جس کے تحت انہیں گریڈ 18 یا 19 کے سینئر سرکاری افسر کے دستخط شدہ حلف نامہ پیش کرنا ہوگا۔
یہ حلف نامہ اس بات کی تصدیق کرے گا کہ مسافر صرف مذکورہ روزگار کے مقام پر کام کرے گا اور غیر قانونی طریقے سے یورپ میں داخل ہونے کی کوشش نہیں کرے گا۔
