وزیراعظم کا پیٹرولیم مصنوعات کی قیمتوں میں بڑی کمی کا اعلان

 اسلام آباد: وزیراعظم شہباز شریف نے ڈیزل اور پیٹرول کی قیمتوں میں بڑی کمی کا اعلان کردیا۔

تفصیلات کے مطابق گزشتہ روز قوم سے خطاب میں وزیراعظم شہباز شریف نے کہا کہ جس وقت ہم نے حکومت سنبھالی تو تیل کی قیمتیں آسمانوں سے باتیں کررہی تھیں جبکہ مہنگائی بھی بہت زیادہ تھی مگر آج عالمی مارکیٹ میں تیل کی قیمتیں کم ہورہی ہیں، میں غلط بیانی نہیں کروں گا اور وعدے کے مطابق قوم کو کمی کا ایک ایک پیسہ واپس پہنچاؤں گا، الحمد اللہ آج وہ موقع آگیا ہے۔

وزیراعظم شہباز شریف نے اعلان کیا کہ ڈیزل کی مد میں 40 روپے 54 پیسے جبکہ پیٹرول کی مد میں 18 روپے پچاس پیسے کی کمی جارہی ہے، جس کا اطلاق 14 جولائی کی رات بارہ بجے سے شروع ہوگیا ہے۔

وزیراعظم شہباز شریف نے کہا کہ پچھلی حکومت نے آئی ایم ایف سے جو سخت معاہدہ کیا تھا اسے جاتے ہوئے تہس نہس کردیا، جب ہم آئے تو مہنگائی عروج پر تھی اور تیل کی قیمتیں آسمان سے باتیں کر رہی تھیں، ہمیں سر منڈواتے ہی اولے پڑے۔

یہ بھی پڑھیں:

آئی ایم ایف سے معاہدہ طے پاگیا، اب ملک کی معاشی مشکلات کم ہوجائیں گی، وزیراعظم

اُن کا کہنا تھا کہ ماضی کی حکومت نے پیٹرولیم مصنوعات کی قیمتوں میں کمی کا کام ہماری مشکلات کو بڑھانے کے لیے کیا کیونکہ اس کے لیے خزانے میں پیسے نہیں تھے، ہمیں تباہ معیشت کے ساتھ پیٹرولیم مصنوعات کی وجہ سے بڑا خسارہ بھی ملا، پھر ہم نے دل پر پتھر رکھ کر مشکل فیصلے کیے اور اللہ کے کرم سے اب ہم آہستہ آہستہ مشکل دور سے نکل رہے ہیں۔

علاوہ ازیں وزیراعظم نے کہا کہ پاکستان اور آئی ایم ایف کے درمیان معاہدے طے پاچکا ہے، جس کا سہرا وزیر خزانہ اور اُن کی ٹیم کو جاتا ہے، مگر کچھ قومیں ایسی بھی تھیں جنہوں نے سالوں پہلے آئی ایم ایف سے چھٹکارا حاصل کرلیا، ہماری دعا اور خواہش یہ ہے کہ یہ ہمارا بھی آخری معاہدہ ہو اور پھر ہم خود اپنے پیروں پر کھڑا ہونے کی کوشش کریں اور خود کفیل ہوجائیں مگر اس کے لیے تھوڑا مشکل راستہ طے کرنا اور اللہ کی ذات پر بھروسہ کرنا ہوگا کیونکہ خود انحصاری واحد راستہ ہے جو قوموں کو عزت اور وقار سے ہمکنار کرتا ہے۔

وزیراعظم کے اعلان کے بعد وزارتِ خزانہ نے پیٹرولیم مصنوعات کی نئی قیمتوں کا نوٹی فکیشن جاری کردیا۔

وزارتِ خزانہ کی جانب سے جاری کیے گئے نوٹی فکیشن کے مطابق پیٹرول کی قیمت 18 روپے 50 پیسے کی کمی کے بعد 230 روپے 24 پیسے ہو گئی ہے۔

ڈیزل کی فی لٹر قیمت میں 40 روپے 54 پیسے کی کمی کے بعد 236 روپے، مٹی کے تیل کی فی لٹر قیمت 33 روپے 81 پیسے کی کمی کے بعد 196 روپے 45 پیسے مقرر کی گئی ہے۔

علاوہ ازیں لائٹ ڈیزل کی قیمت 34 روپے 71 پیسے کی کمی کے بعد 191 روپے 44 پیسے ہو گئی ہے۔