گوگل نیوز پر ہمیں فالو کریںوزیر اعلیٰ مریم نواز کی قیادت میں صوبائی حکومت نے حال ہی میں پنجاب سیف سٹیز اتھارٹی کی پبلک سیفٹی ایپ کی ایک ایسی اپ ڈیٹ جاری کی ہے جو ایک نئے فیچر کے طور پر شہریوں کیلئے ڈراؤنا خواب بھی ثابت ہوسکتی ہے۔
حال ہی میں سامنے آنے والی ایک رپورٹ میں دعویٰ کیا گیا ہے کہ عوامی سیفٹی ایپ شہریوں کے موبائل فونز کو نگرانی کے آلات مین بدلنے کی بھرپور صلاحیت رکھتی ہے، جس کے نتیجے میں شہریوں کو پرائیویسی کے شدید تحفظات رہیں گے اور پرائیویسی کے سنگین مسائل بھی جنم لے سکتے ہیں۔
View this post on Instagram
مذکورہ رپورٹ میں دعویٰ کیا گیا ہے کہ پبلک سیفٹی ایپ کے تحت شہری ہنگامی حالات میں اپنے موبائل فون کے کیمرے سے لائیو ویڈیو سیف سٹی کے کنٹرول روم کو ارسال کرسکتے ہیں اور جب کوئی شخص ہیلپ لائن 15 پر کال کرتا ہے تو اسے ایک خاص لائیو فیڈ لنک موصول ہوتا ہے جسے کھولتے ہی فون کا کیمرہ حکام کو لائیو ویڈیو دکھانا شروع کردیتا ہے۔
View this post on Instagram
یہ فیچر مبینہ طور پر واٹس ایپ کی ویڈیو کال کی طرح کام کرتا ہے جو عوام پولیس کو نہیں بلکہ اپنے قریبی رشتہ داروں کو ہی کرنا چاہیں گے، تاہم حکام کا دعویٰ ہے کہ اس فیچر کی مدد سے واقعات کی فوری تصدیق اور عوام کو مدد کی فراہمی تیز تر کرنے میں مدد ملے گی۔
View this post on Instagram
ایک جانب تو یہ فیچر ہنگامی حالات میں شہریوں کی جان بچانے سمیت دیگر ہنگامی اقدامات کیلئے اہمیت کا حامل ہے تو دوسری جانب آئی ٹی ماہرین اس فیچر کو عوامی پرائیویسی کیلئے ڈراؤنا خواب قرار دیتے ہیں کیونکہ لائیو فیڈ لنک کا فیچر نہ جاننے والے شہری اس لنک کو بے خیالی میں کھول کر اپنی یا اپنے عزیزوں کی ایسی ویڈیو بھی شیئر کر بیٹھیں گے جو دکھانا نامناسب ہو۔
ماہرین کا ماننا ہے کہ یہ حقیقت نظر انداز نہیں کی جاسکتی کہ یہ فیچر بڑے پیمانے پر عوامی نگرانی، غلط استعمال اور ذاتی پرائیویسی کی خلاف ورزی کیلئے آسانی سے استعمال ہوسکتا ہے اور ایک ایسے ملک میں جہاں پہلے ہی ٹریفک اور نگرانی کے کیمروں کی فوٹیج لیک ہو کر سوشل میڈیا پر نشر ہوتی رہی ہو، وہاں ہر شخص کو موبائل سیف سٹی کیمرہ بنا دینا خطرے کو کئی گنا بڑھانے کا باعث بن سکتا ہے۔
