گوگل نیوز پر ہمیں فالو کریںپاکستان ٹیلی کمیونیکیشن اتھارٹی نے عوام کو خبردار کیا ہے کہ تمام غیر رجسٹرڈ موبائل فونز کو مقامی نیٹ ورکس سے بلاک کر دیا جائے گا۔
پی ٹی اے کے مطابق شہریوں کو ہدایت کی گئی ہے کہ وہ اپنے موبائل فونز کو ڈیوائس آئیڈینٹی فکیشن رجسٹریشن اینڈ بلاکنگ سسٹم کے ذریعے رجسٹر کروائیں تاکہ بلا تعطل سروس حاصل کر سکیں۔
اتھارٹی نے واضح کیا ہے کہ غیر رجسٹرڈ موبائل فونز نہ صرف قومی سلامتی کے لیے خطرہ ہیں بلکہ ان کے ذریعے مالیاتی اور سائبر فراڈ جیسے جرائم میں بھی اضافہ ہو سکتا ہے۔
پی ٹی اے نے کہا کہ ایسے فونز کا رکھنا، فروخت یا استعمال موجودہ قوانین کے تحت جرم ہے اور اس پر قانونی کارروائی عمل میں لائی جا سکتی ہے۔
پی ٹی اے نے شہریوں کو غیر رجسٹرڈ موبائل خریدنے یا بیچنے سے سختی سے منع کیا ہے کیونکہ یہ فونز سرکاری نظام میں شامل نہیں ہوتے اور اس لیے ان کا قانونی طور پر استعمال ممکن نہیں۔
انتباہ میں کہا گیا ہے کہ ایسے موبائل فونز کے مسلسل استعمال پر صارفین کو سروس معطلی اور قانونی کارروائی کا سامنا کرنا پڑ سکتا ہے۔
اتھارٹی نے مزید کہا ہے کہ صارفین کے پاس محدود وقت ہے اور کسی بھی قسم کی رکاوٹ سے بچنے کے لیے ضروری ہے کہ وہ اپنے موبائل فونز کا اسٹیٹس ڈی آئی آر بی ایس پورٹل پر چیک کریں اور رجسٹریشن کا عمل مکمل کریں۔
