پی ٹی آئی رہنما شہباز گل کی گاڑی موٹروے پر حادثے کا شکار

اسلام آباد: پاکستان تحریک انصاف کے رہنما شہباز گل کی گاڑی موٹروے پر حادثے کا شکار ہوگئی۔

سابق معاون خصوصی برائے سیاسی ابلاغ ڈاکٹر شہباز گل کی گاڑی کو موٹروے پر پیچھے سے آنے والی گاڑی نے ٹکر ماری جس کے باعث وہ زخمی ہو گئے ہیں۔

شہباز گل کا اپنے بیان میں کہنا تھا کہ موٹروے پرگاڑی حادثے کا شکارہوئی جس کے دوران میں زخمی ہوا ہوں۔

اللہ @SHABAZGIL کو اپنی حفظ و امان میں رکھے ،، حادثے میں انکی گاڑی الٹ گئی ! pic.twitter.com/CPmV0QcHdq

— Hassan Ayub Khan (@HassanAyub82) May 5, 2022

بعدازاں اُن کے ساتھی کا کہنا تھا کہ شہباز گل کی گاڑی کو پیچھے سے آنے والی گاڑی نے ہٹ کیا، ایسا لگتا ہے کہ بظاہریہ حادثہ سوچے سمجھے منصوبے کے تحت پیش آیا۔

 واضح رہے کہ پولیس نے حادثے کی تحقیقات شروع کر دی ہیں۔شہباز گل کی گاڑی کو حادثہ موٹر وےایم ٹو خانقاں ڈوگراں تحصیل صفدرآباد ضلع شیخوپورہ میں پیش آیا، شہباز گل گاڑی نمبر اے ٹی یو 866 پر لاہور سے اسلام آباد آرہے تھے۔

شہباز گل سمیت گاڑی میں موجود چار افراد حادثے میں معمولی زخمی ہوئے سی سی ٹی وی فوٹیج کے جائزے کے بعد یہ بات سامنے آئی ہے کہ پچھلی گاڑی کی جانب سے بروقت بریک نہ لگنا حادثے کا باعث بنا۔

قبل ازیں پی ٹی آئی رہنما شہباز گل نے ایک ویڈیو پیغام جاری کیا تھا جس میں انہوں نے کہا تھا کہ یہ جانتے بوجھتے کہ یہ لوگ ایک بعد دوسرا کیس بنائیں گے، میں واپس پاکستان آرہا ہوں۔اُن کا کہنا تھا کہ ایک میں ضمانت لیں گے تو دوسرا تیار ہوگا، لیکن پاکستان آنے کی وجہ صرف ایک ہے اور وہ یہ کہ میری ماں باجوہ اور باپ گِل ہے۔