گوگل نیوز پر ہمیں فالو کریںمحکمۂ موسمیات کے مطابق کراچی میں اگلے چند گھنٹوں کے دوران موسم میں نمایاں تبدیلی متوقع ہے کیونکہ کوئٹہ کی سمت سے چلنے والی سرد اور خشک ہوائیں شہر کا رخ کرنے والی ہیں۔
ان ٹھنڈی ہواؤں کے باعث کراچی کی فضا میں خنکی بڑھ جائے گی اور شہریوں کو موسمِ سرما کی شدت واضح طور پر محسوس ہونے لگے گی۔
محکمۂ موسمیات کا کہنا ہے کہ کراچی میں رات کے اوقات میں درجہ حرارت مزید کم ہو کر 13سے 15ڈگری کے درمیان رہنے کا امکان ہے۔
مسلسل چلنے والی ان ٹھنڈی ہواؤں کے نتیجے میں شہر میں سردی کی ایک نئی لہر داخل ہوگی جبکہ موجودہ فضائی دباؤ بھی اس تبدیلی کو مزید مضبوط بنا رہا ہے۔
موسمی ماہرین کے مطابق اس وقت ملک کے بیشتر علاقوں پر براعظمی خشک ہواؤں کا غلبہ ہے جس کے باعث موسم مجموعی طور پر خشک اور سرد رہے گا۔
ملک کے بالائی اور پہاڑی علاقوں میں خاصی سخت سردی کی پیشگوئی کی گئی ہے جبکہ پنجاب اور خیبر پختونخوا کے میدانی علاقوں میں دھند بڑھنے کا امکان ظاہر کیا جا رہا ہے۔
صبح اور رات کے اوقات میں دھند اور اسموگ کے باعث حدِ نگاہ کم ہو سکتی ہے، جس سے ٹریفک کی روانی متاثر ہونے کا خدشہ بھی ہے۔
محکمۂ موسمیات کا یہ بھی کہنا ہے کہ شمالی علاقوں میں آئندہ چند دنوں کے دوران دن اور رات کے درجۂ حرارت مزید نیچے آنے کا امکان ہے جس سے موسم مزید سرد اور خشک ہو جائے گا۔
ملک کے مختلف حصوں میں پہلے ہی ٹھنڈ اور خشک موسم کا راج ہے، جبکہ پہاڑی علاقوں میں شدید سردی چھائی ہوئی ہے۔
