عدلیہ اور پولیس کو دھمکیاں، رانا ثناء اللہ کا عمران خان کیخلاف کارروائی کا اعلان

اسلام آباد: وفاقی وزیرِ داخلہ رانا ثناء اللہ نے عدلیہ اور پولیس کو مبینہ طور پر دھمکیاں دینے پر چیئرمین پی ٹی آئی عمران خان کے خلاف کارروائی کا اعلان کرتے ہوئے کہا ہے کہ عمران خان قانون کے سامنے آنے کیلئے تیار ہوجائیں۔

تفصیلات کے مطابق گزشتہ روز سابق وزیر اعظم عمران خان کے بیان پر ردِ عمل دیتے ہوئے وزیرِ داخلہ رانا ثناء اللہ نے کہا کہ ساری دنیا نے براہِ راست دیکھا کہ عمران خان نے کارِ سرکار میں مداخلت اور دھمکیاں دیں، چیئرمین پی ٹی آئی کو جواب دینا پڑے گا۔

یہ بھی پڑھیں:

این اے 245 کراچی میں ضمنی انتخاب شروع، پی ٹی آئی کے محمود مولوی اور ایم کیو ایم میں مقابلہ

عمران خان پر تنقید کرتے ہوئے رانا ثناء اللہ نے کہا کہ بشریٰ بی بی یا فرح گوگی کی کرپشن کا نام لیں تو عمران خان کو اسلامی ٹچ یاد آجاتا ہے۔ قانون پر عملدرآمد نہ کرنے پر پاکستان جنگل بن جائے گا۔

وفاقی وزیرِ داخلہ نے کہا کہ فوج میں بغاوت پر اکسانے والوں کو قانون سے بھاگنے، شہداء کی توہین، بغاوت پر اکسانے اور ریاستی رٹ کو چیلنج نہیں کرنے دیں گے۔ اس روئیے سے انتہا پسندوں اور دہشت گردوں کی حوصلہ افزائی ہوگی جس پر کارروائی کریں گے۔

خیال رہے کہ وفاقی حکومت پہلے ہی عمران خان کی تقاریر کے خلاف کارروائی کا آغاز کرچکی ہے۔ پیمرا نے گزشتہ شب ہی عمران خان کی تقریر براہِ راست نشر کرنے پر پابندی عائد کردی تھی۔