حکومت نے ریکوڈک منصوبے پر کام 14اگست سے شروع کرنے کا اعلان کردیا

کوئٹہ: بلوچستان حکومت نے اعلان کیا ہے کہ ریکوڈک منصوبے پر آئندہ ماہ 14 اگست سے کام شروع کردیا جائے گا۔

تفصیلات کے مطابق وزیر اعلیٰ بلوچستان میر عبدالقدوس بزنجو اور ریکوڈک منصوبے پر کام کرنیوالی کمپنی بیرک گولڈ کارپوریشن نے صوبائی دارالحکومت کوئٹہ میں مشترکہ پریس کانفرنس کے دوران منصوبے پر کام کے آغاز کا اعلان کیا۔

یہ بھی پڑھیں:

بھارت، مرکزی بینک کرپٹو کرنسی پر پابندی کا خواہشمند

پریس کانفرنس کے دوران وزیر اعلیٰ عبدالقدوس بزنجو نے کہا کہ ریکوڈک منصوبے پر باضابطہ کام 14اگست سے شروع ہوگا۔ صوبہ سالانہ 1ارب ڈالر آمدن حاصل کرسکے گا جبکہ 7 ہزار 500 افراد روزگار حاصل کرسکیں گے۔ مقامی افراد کو ترجیح حاصل ہوگی۔

وزیر اعلیٰ نے کہا کہ ریکوڈک منصوبہ 40 سال تک جاری رہ سکتا ہے۔ بیرک گولڈ کمپنی کے سربراہ مارک برسٹو نے پریس کانفرنس کے دوران کہا کہ کمپنی اور پاکستان کے درماین حتمی معاہدوں پر کام کر رہے ہیں۔ کمپنی کا شیئر 50 فیصد ہوگا۔

سربراہ بیرک گولڈ کمپنی مارک برسٹو نے مزید کہا کہ پاکستان کی وفاقی حکومت اور بلوچستان کے مابین ریکوڈک منصوبے کا 25، 25 فیصد حصہ ہوگا۔ بلوچستان حکومت کو سرمایہ کاری کیے بغیر رائلٹی اور ڈیویڈنڈ بھی دیا جائے گا۔

مارک برسٹو نے مزید کہا کہ بیرک کمپنی قانونی اقدامات کے بعد فزیبلٹی اسٹڈی کا جائزہ لے گی۔ ریکوڈک ذخائر سے تانبا اور سونا پہلی بار 2027 تک نکلنے کا امکان ہے۔ کان کی منصوبہ بندی روایتی اوپن ریٹ سے کریں گے۔ کان کی عمر 40سال اور کم و بیش 4000 طویل مدتی ملازمتیں پیدا کی جائیں گی۔