گوگل نیوز پر ہمیں فالو کریںپنجاب کے ضلع اوکاڑہ کے علاقے حویلی لکھا کے ستگھرہ کے پولیس اسٹیشن میں ایک سنسنی خیز واقعے میں ایک پولیس کانسٹیبل نے اسٹیشن ہاؤس افسر پر فائرنگ کر دی جس کے نتجے میں انسپکٹر شدید زخمی ہو گئے۔ واقعے کے فوری بعد ملزم فرار ہو گیا تاہم پولیس حکام نے ملزم کو گرفتار کرلیا۔
تفصیلات کے مطابق ملزم کانسٹیبل عبداللہ نے پولیس اسٹیشن کے اندر ایس ایچ او پر فائرنگ کی جس سے وہ شدید زخمی ہوئے جس پر انہیں فوری طور قریبی اسپتال منتقل کیا گیا جہاں انہیں ہنگامی طبی امداد فراہم کی گئی۔
ضلعی پولیس افسر محمد رشید ہدایت نے واقعے کی تصدیق کرتے ہوئے بتایا کہ ملزم کو گرفتار کر کے تفتیش کے لیے حراست میں منتقل کر دیا گیا ہے۔ ایس پی انویسٹی گیشن ملک داؤد کی قیادت میں ایک ٹیم پوری صورتحال اور اس واقعے کے محرکات جاننے کے لیے کام کر رہی ہے۔
پولیس نے کانسٹیبل عبداللہ کے خلاف سنگین الزامات، بشمول قتل کی کوشش، کے تحت مقدمہ درج کر دیا ہے۔ ساتھ ہی محکمہ جاتی کارروائی بھی شروع کر دی گئی ہے تاکہ پولیس فورس کے اندر اس غیر معمولی واقعے کے تمام پہلو سامنے آ سکیں۔
ڈی پی او اسپتال میں زخمی ایس ایچ او کی عیادت کی اور فراہم کی جانے والی طبی سہولتوں کا جائزہ لیا۔ پولیس حکام نے یقین دلایا ہے کہ تفتیش مکمل ہونے کے بعد واقعے کی تمام حقائق عوام کے سامنے لائی جائیں گی۔
