گوگل نیوز پر ہمیں فالو کریںامریکی گلوکارہ اور گیت نگار ٹیلر سوئفٹ اپنے بارہویں اسٹوڈیو البم دی لائف آف اے شوگرل کی ریلیز سے چند گھنٹے قبل ہی آن لائن لیک ہونے پر مداحوں کے دباؤ اور جذباتی ردعمل کا مرکز بن گئیں۔
بین الاقوامی میڈیا رپورٹس کے مطابق 12 گانوں پر مشتمل یہ البم ابتدائی طور پر کم معیار کی آڈیو فائلز کی شکل میں سوشل پلیٹ فارمز، بالخصوص ڈسکارڈ اور ریڈٹ پر گردش کرنے لگا جس کی وجہ کچھ مداحوں کو اصل لانچ سے پہلے فزیکل کاپیاں مل جانا بتایا گیا۔
اگرچہ ٹیلر سوئفٹ نے براہ راست کوئی بیان جاری نہیں کیا، لیکن انہوں نے انسٹاگرام پر ایک ویڈیو کو لائک کیا جس میں ایک پوڈکاسٹ ہوسٹ نے لیک ہونے کی مذمت کی اور کہا کہ یہ فنکار کی تخلیقی محنت کے ساتھ ناانصافی ہے۔
اس اشارے کو مداحوں نے ان کی خاموش مگر واضح ناراضی کے طور پر دیکھا۔ سوشل میڈیا پر بحث چھڑ گئی اور زیادہ تر مداحوں نے اس اقدام کو غیر منصفانہ قرار دیا۔ ایک صارف نے لکھا: اصل مداح ریلیز ڈے کا انتظار کرتے ہیں۔
اس تنازع کے باوجود جمعہ کی صبح البم باقاعدہ ریلیز کر دیا گیا اور چند ہی گھنٹوں میں بڑے اسٹریمنگ پلیٹ فارمز پر سرفہرست رہا۔
دنیا بھر کے مداحوں نے جوش و خروش کے ساتھ اس ریلیز کا جشن منایا اور اسے سب سے ذاتی اور بااختیار بنانے والا پروجیکٹ قرار دیا۔ سوئفٹ نے ایک جذباتی پیغام میں کہا کہ یہ البم ان کے لیے ایک بالکل درست قدم محسوس ہوتا ہے اور وہ اس تخلیقی سفر پر فخر کرتی ہیں۔
دی لائف آف اے شوگرل کو نہ صرف ان کے کیریئر میں ایک بڑا سنگ میل قرار دیا جا رہا ہے بلکہ یہ ان کی زندگی کے ایک نئے مرحلے کی بھی عکاسی کرتا ہے کیونکہ یہ ان کا پہلا البم ہے جس کے دوران وہ باضابطہ طور پر منگیتر ٹریوس کیلسی کے ساتھ ہیں۔
اس کے علاوہ یہ وہ پہلا البم بھی ہے جس میں انہوں نے اپنے دیرینہ پارٹنر جیک اینٹونوف کے بجائے معروف پروڈیوسرز میکس مارٹن اور شیل بیک کے ساتھ کام کیا۔
امریکا میں 5 دن کی بچی کو گود میں لے کر ماں نے ٹورنامنٹ جیت لیا
البم کی ریلیز کے ساتھ ہی مداحوں نے پرجوش تبصرے شروع کر دیے۔ کسی نے اسے سال کا سب سے بہترین البم قرار دیا تو کسی نے لکھاکہ ٹیلر نے صرف البم نہیں، بلکہ ایک نئی تہذیب کا آغاز کر دیا۔
کئی مداحوں نے اس کے گانوں کے بولوں میں پوشیدہ اشارے ڈھونڈنے شروع کر دیے، جنہیں وہ ان کی ذاتی زندگی اور منگیتر سے جوڑنے لگے۔
