گورنروپی ٹی آئی کوایڈمنسٹریٹرکی تقرری پراعتراض کاحق نہیں،مرادعلی شاہ

کراچی: وزیراعلیٰ سندھ سید مراد علی شاہ نے کہا ہے کہ مرتضیٰ وہاب کی تقرری حکومت سندھ کا اختیار ہے،گورنرسمیت پی ٹی آئی کوایڈمنسٹریٹرکی تقرری پراعتراض کاحق نہیں ہے۔

نمازعید کے بعد میڈیا سے گفتگو کرتے ہوئے وزیراعلیٰ سندھ سید مراد علی شاہ نے کہا کہ جیسے خیبرپختونخوا کے کسی وزیرپراعتراض میرا حق نہیں ہے اسی طرح گورنرسندھ عمران اسماعیل یاپی ٹی آئی کوایڈمنسٹریٹرکی تقرری پراعتراض کاحق نہیں ہے ۔

مراد علی شاہ کا کہنا تھا کہ پیپلز پارٹی یقین رکھتی ہے کہ جس کا جو اختیار ہے وہ استعمال کرے، مرتضیٰ وہاب کی بطور ایڈمنسٹریٹر کراچی تقرری حکومت سندھ کا اختیار ہے۔

مزید پڑھیں:وزیراعلیٰ سندھ اور وزیر بلدیات سندھ کی امت مسلمہ کو عید کی مبارکباد

وزیراعلیٰ سندھ سیدمرادعلی شاہ نے کہا کہ کشمیر کےانتخابات میں عوام پیپلزپارٹی کا ساتھ دیں گے، سندھ میں پیپلزپارٹی کے خلاف نئے سیاسی اتحادکے حوالے سے انہوں نے کہا کہ پیپلزپارٹی کی مخالفت میں کئی اتحاد آئے اور گئے،سندھ کے لوگ پیپلز پارٹی کے ساتھ ہیں۔

واضح رہے کہ سندھ حکومت نے پیپلزپارٹی کے رہنماء بیرسٹر مرتضیٰ وہاب کو ایڈمنسٹریٹر کراچی تعینات کرنے کا فیصلہ کیا ہے جبکہ صوبائی کابینہ نے اس کی منظوری بھی دیدی ہے تاہم گورنر سندھ عمران اسماعیل اور دیگر پی ٹی آئی رہنماؤں نے بیرسٹر مرتضیٰ وہاب کو ایڈمنسٹریٹر کراچی بنانے کی شدید مخالفت کی ہے۔