گوگل نیوز پر ہمیں فالو کریںبالی ووڈ فلم انڈسٹری کے جانے پہچانے ستاروں میں مقبول بھارتی سیاست دان بابا صدیقی کے قاتل بھارتی شہری نکلے جبکہ سیاست دان کی لاش گھر پہنچا دی گئی ہے۔
اب سے کچھ ہی دیر قبل سوشل میڈیا پر شیئر کی گئی ویڈیو میں دکھایا گیا ہے کہ ایک ایمبولینس بابا صدیقی کی رہائش گاہ پر پہنچی ہے جس میں مرحوم سیاسی رہنما کی جسمانی باقیات موجود ہیں۔ بھارت میں بابا صدیقی کے خیر خواہ ان کے اہلِ خانہ کیلئے دعائیں کر رہے ہیں۔
View this post on Instagram
بھارتی میڈیا کا کہنا ہے کہ بابا صدیقی کے قاتلوں میں دو نوجوان شوٹر لڑکے شامل ہیں جن میں سے ایک بھارتی ریاست اتر پردیش کا رہنے والا ہے جبکہ دوسرا بھارتی ریاست ہریانہ کا رہائشی ہے۔ بھارتی پولیس نے معاملے کی تفتیش شروع کردی جس میں واقعے کے تمام پہلوؤں کا جائزہ لیا جارہا ہے۔
اس حوالے سے بی جے پی کے قومی ترجمان پردیپ بھنڈاری کا کہنا ہے کہ فائرنگ کے واقعے میں بابا صدیقی کا قتل افسوسناک ہے۔ حکومت نے گزشتہ 24 گھنٹوں کے دوران واقعے میں ملوث 2 ملزمان کو گرفتار کر لیا ہے جبکہ ایک کی تلاش جاری ہے جو جلد پکڑا جائے گا۔ ملزمان کو چھوڑا نہیں جائے گا اور اس معاملے پر سیاست نہیں کرنی چاہئے۔
ترجمان بی جے پی نے کہا کہ بابا صدیقی ایک بڑے سیاست دان تھے اور مہاراشٹر کی این ڈی اے حکومت میں کوئی بھی شخص قتل کرکے قانون سے بچ نہیں سکتا۔ واقعہ سامنے آنے کے کچھ ہی لمحوں بعد پولیس حرکت میں آگئی اور فوری طور پر ایک تحقیقاتی ٹیم تشکیل دے دی گئی تھی۔
