خواتین کے عالمی دن کے موقع ملک کے مختلف شہروں میں ریلیوں کا انعقاد

کراچی: ملک کے مختلف شہروں میں ”عورت مارچ“ کے تحت خواتین کی جانب سے ریلیوں کا انعقاد کیا گیا، عورت مارچ 2021ء کے سلسلے میں خواتین کی جانب سے نکالی گئی ریلیوں میں خواتین نے پلے کارڈز، پوسٹرزاُٹھا رکھے تھے۔

تفصیلات کے مطابق پاکستان کے مختلف شہروں میں پیر کو خواتین کے عالمی دن کے موقعے پر عورت مارچ کا انعقاد کیا گیا۔کراچی، حیدرآباد اور مختلف شہروں کے علاوہ وفاقی دارالحکومت اسلام آباد میں عورت آزادی مارچ پریس کلب سے شروع ہو کر ڈی چوک پرپہنچ گیا۔

خواتین کے حقوق کے لئے نکالی گئی ریلیوں میں مختلف شعبوں سے تعلق رکھنے والی خواتین کے علاوہ مرد بھی بڑی تعداد میں شریک ہوئے۔ گذشتہ سال تصادم کے واقعے کے بعد اس بار سکیورٹی کے سخت انتظامات کیے گئے تھے۔

عورت مارچ کے سلسلے میں نکالی گئی ریلیوں میں پولیس کی بھاری نفری کے علاوہ منتظمین کی جانب سے رضا کار تعینات کیے گئے۔ ‘غیر متعلقہ افراد کو مارچ کا حصہ بننے کی اجازت نہیں۔ صرف بیج والے میڈیا نمائندے اس کی کوریج کر سکتے ہیں اور شرکا سے بات کرسکتے ہیں۔’اس کے علاوہ کسی کو آنے کی اجازت نہیں ہے۔

اسلام آباد میں ہونے والے مارچ میں بارش کی وجہ سے تعداد میں کمی دیکھی گئی ہے لیکن جوں جوں مارچ ڈی چوک کی طرف بڑھا، اس کی تعداد میں اضافہ دیکھا جا رہا ہے۔

دوسری جانب جماعت اسلامی کی جانب سے بھی خواتین کے عالمی دن کی مناسبت سے مختلف شہروں میں ریلیاں نکالی گئی، کراچی میں ہونے والی جماعت اسلامی کی خواتین کی ریلی سے حافظ نعیم الرحمن نے خطاب کیا۔

دوسری جانب پیپلز پارٹی کی رہنما اور سندھ میں وزیر برائے ترقی نسواں شہلا رضا کی زیر اہتمام سندھ اسمبلی میں چھوٹے پیمانے پر ایک مارچ دیکھا گیا جس میں اراکین اور سرکاری ملازمین نے شرکت کی۔